Буюк Британияда коронавирус инфекцияси тарқалишига қарши чора-тадбирлар доирасида умуммиллий карантин жорий этилди. Бу ҳақда мамлакат бош вазири Борис Жонсонга таяниб, BBC хабар қилади.
Жонсоннинг таъкидлашича, 23 мартдан бошлаб мамлакатдаги озиқ-овқат ва бирламчи зарур маҳсулотлар билан савдо қиладиган дўконлардан ташқари барча дўконлар ёпилади. Шунингдек, маданий муассасалар, болалар майдончалари ва ибодатхоналар ҳам ёпилади; дафндан бошқа маросимларни ўтказиш тўхтатилади.
Британияликларга уйдан фақат бирор нима харид қилиш ёки жисмоний тарбия билан шуғулланиш, шунингдек, даволаниш ёки масофадан туриб бажариб бўлмайдиган ишга бориш учун чиқишга рухсат этилади. Икки кишидан ортиқ инсоннинг бир жойда тўпланиши (бирга яшаётган оила аъзоларидан ташқари) тақиқланади.
Полиция зиммасига ушбу чораларга риоя қилмаган фуқароларни жаримага тортиш вазифаси топширилган. Жонсоннинг сўзларига кўра, чекловлар уч ҳафта давомида амалда бўлади, ҳукумат кейинроқ уни юмшатиши мумкин.
Ҳозирда Буюк Британия коронавирус билан касалланганлар сони бўйича Европа давлатлари орасида олтинчи ўринда (Италия, Испания, Германия, Франция ва Швейцариядан кейин) турибди. Мамлакатда 5 мингдан ортиқ одам вирус юқтириб олган бўлиб, уларнинг 200 дан ортиғи вафот этган.
Мавзуга доир: Ўзбекистонда коронавирус инфекцияси тарқалишига қарши кучайтирилган тартиб жорий этилади
Изоҳ (0)