Тошкентда фавқулодда ҳолат жорий этиб, карантинни назорат қилишга армияни қисман сафарбар этиш таклиф этилди

Олий Мажлис қонунчилик палатаси депутати, «Юксалиш» умуммиллий ҳаракати раиси Акмал Бурхонов Тошкент шаҳри ва вилоятида фавқулодда ҳолат тартибини жорий этиш, карантин шартларига риоя этилишини лозим даражада назорат қилиш учун армияни қисман сафарбар этишни таклиф қилди.

Шунингдек, у мамлакатда касалланганлар сони ортишининг олдини олиш борасида яна бир қатор тавсияларни таклиф этди:

• йўловчиларни шаҳар ва туманларга темир йўл, авиа, автобус ва автомобилда ташишни бутун республика бўйлаб чеклаш;
• вилоятларда, айниқса, мамлакатнинг чекка ҳудудларида мобил пункт ва лабораториялар яратиш ва уларни коронавирусни аниқловчи портатив ва экспресс тестлар билан таъминлаш;
• COVID-19 тестининг импорт ва реализация қилувчи хусусий сектор устидан давлат назоратини ўрнатиш;
• эпидемияга қарши тадбирларни амалга ошириш, шу жумладан, барча ташкилотлар, муассасалар ва жамоат жойлари (транспорт, дам олиш жойлари, савдо марказлари, бозорлар, ёқилғи қуйиш шохобчалари, кўп қаватли биноларнинг кириш жойлари)ни бепул дезинфекция қилиш;
• алоҳида корхона ва ташкилотларни зарур маҳсулотларни ишлаб чиқаришга йўналтириш, масалан, шахсий ҳимоя воситалари (ниқоблар, респиратор ва бошқалар), антисептиклар, дорилар ва ускуналар (сунъий нафас олдириш аппаратлари);
• масофавий хизматларни, шу жумладан, вилоятларда зарур дори-дармонлар ва маҳсулотлар, озиқ-овқат ва бошқа зарур товарларга буюртма бериш тизимини кенгайтириш.

23 март ҳолатига кўра, Ўзбекистонда коронавирус билан касалланган сони 46 нафарни ташкил этмоқда. Ҳукумат 65 ёшдан ошганларга кўчага чиқмасликни тавсия қилган, жамоат жойларида ниқобсиз юриш тақиқланган, 25 мартдан бошлаб ниқобсиз юрганлар жаримага тортилиши, тиббий ниқоб танқислигини келтириб чиқарганларга қатъий чоралар кўрилиши белгиланди.

Аҳолининг кундалик эҳтиёжи инобатга олинган ҳолда деҳқон бозорлари, супермаркетлар, озиқ-овқат дўконлари, шифохоналар, поликлиникалар, дорихоналар, турли таомларни етказиб бериш хизматлари фаолияти тўхтатилмаслиги маълум қилинди.