Ўзбекистон фуқароларининг ҳарбий хизматга навбатдаги чақируви номаълум муддатга кечиктирилди. Бу ҳақда «Дарё»га Мудофаа вазирлиги хабар берди.
Таъкидланишича, ушбу қарор коронавирус тарқалиши хавфини камайтириш учун қабул қилинган.
«Ўзбекистон Қуролли кучлари муддатли ҳарбий хизматга чақирилган фуқароларсиз ҳам мамлакат хавфсизлиги, чегаралар дахлсизлиги ҳамда барқарорликни таъминлаш қудратига эга. Навбатдаги чақирувнинг кечиктирилиши миллий армиямиз салоҳиятига путур етказмайди», — дея муносабат билдирди Мудофаа вазирлигидаги мутасадди шахс.
Маълум қилинишича, чақирувнинг кечикиши армия сафидаги муддатли ҳамда сафарбарлик чақируви резервидаги ҳарбий хизматга ҳам татбиқ этилади. Сафарбарлик чақируви резервидаги ҳарбий хизмат учун шартнома имзолаб, тўловни бажарган шахслар режа асосида ўрнатилган тартибда хизматни кейинроқ ўташи айтилмоқда.
«Бундан кўзланган асосий мақсад — вирус тарқалишига қарши курашиш. Чақирув учун номзодлар тиббий кўрикдан ўтади, уларнинг яқинлари маросимлар учун йиғилиши мумкин. Шуларни инобатга олиб, чақирувни кечиктириш мақсадга мувофиқ, деб топилди», — дейди суҳбатдош.
Эслатиб ўтамиз, февраль ойининг охирида «Ўзбекистон Республикаси фуқароларининг муддатли ҳарбий хизматга навбатдаги чақируви ҳамда белгиланган хизмат муддатини ўтаб бўлган ҳарбий хизматчиларни Қуролли Кучлар резервига бўшатиш тўғрисида»ги Президент қарори қабул қилинган эди. Ўзбекистонда 2020 йилдан бошлаб 18 ёшдан 27 ёшгача бўлган йигитлар бир йиллик муддатли ҳарбий хизматга бориши қатъиян белгиланган. Бундан ташқари, олий маълумотли фуқаролар ҳам 12 ой ҳарбий хизматни ўтайдиган бўлган.
Изоҳ (0)