Фарғоналик тадбиркор аҳолига 30 миллион сўмлик озиқ-овқат маҳсулотлари, тиббий ниқоб ва шахсий гигиена воситаларини бепул тарқатди. Бу ҳақда «Дарё» мухбири Азизжон Эрматов хабар бермоқда.
Маълум қилинишича, мазкур хайрли иш «Ишонч» кредит-савдо маркази, Ёшлар иттифоқи ва «Ёшлар – келажагимиз» жамғармаси фаоллари ҳамкорлигида амалга оширилган.
Хайрия тадбири давомида 210 та эҳтиёжманд оилага кўмак берилган.
«Ўзбекистонда коронавирус пандемияси сабаб карантин эълон қилингач, ҳудудларда озиқ-овқат маҳсулотлари нархида сунъий ўсиш кузатилди. Тиббиёт ниқоблари ва антисептик воситалар тақчиллиги юзага келди. Шундай кунларда юртдошларимизга оз бўлса-да кўмак бериш мақсадида хайрия акциясини бошладик. Акция давомида водийнинг 21 та шаҳар ва туманларида яшовчи 210 та эҳтиёжманд оилага озиқ-овқат маҳсулотлари: гўшт, ёғ, ун, гуруч, шакар ҳамда тиббий ниқоблар бепул тарқатилди. Акциянинг иккинчи босқичида яна шунча оилага озиқ-овқат маҳсулотлари ва шахсий гигиена воситаларини етказиб берамиз», — дейди «Ишонч» кредит-савдо маркази ижрочи директори Азизбек Ҳасанбоев.
Таъкидланишича, «Ишонч» кредит-савдо марказининг Фарғона водийсидаги 14 та филиалида тиббий ниқоб, салфетка ва антисептик воситаларни бепул тарқатиш давом эттирилмоқда.
Изоҳ (0)