«Эпидемия тугагунча, Россияда бўлиб турайлик. Ўзбекистонга ёрдамимиз шу бўлсин». Юрист Россиядаги ватандошларга мурожаат қилди

Россиянинг Москва шаҳрида юристлик фаолиятини олиб борувчи Ботиржон Шермуҳаммад ушбу мамлакатда бўлиб турган ўзбекистонликларга мурожаат билан чиқди.

У мурожаатида айни пайтда Россияда бўлиб турган Ўзбекистон фуқароларини шу ерда қолишга чақирди.

Бунга бир қанча сабабларни келтираман:

1) сарсон бўласиз, чартер рейсларда, аввало, беморлар, ҳомиладор ва ёш болали аёллар, қариялар ва Uzbekistan Airways’нинг 16 мартдан 21 мартгача бўлган давридаги бекор қилинган рейсларга билети бор фуқаролар кетишади. Билет топиш ҳам осон бўлмайди. Ўзбекистонга бориб, 14 кун махсус жойларда карантинда бўласиз. 20 килограммдан кам бўлмаган юкларингиз билан у ерларга етиб бориш ва жойлашиш ҳам осон эмас. Айниқса, ёш болалар билан. Шароитлар ҳам олий даражада эмас;

2) карантин пайтида сизга ёки сиз орқали бошқаларга касаллик юқиши эҳтимоли катта. Вирус четдан келганлардан юқмоқда. Карантинда турганлар ўзаро мулоқот пайтида бир-бирларига юқтиришлари мумкин. Шифокорлар барчага имкон борича, жамоат жойларида камроқ бўлишни тавсия қилишмоқда. Вакцина йўқ ҳозирги шароитда энг самарали усул — шу. Касалланганлар бирдан кўпайиб кетса, ҳеч қайси давлатнинг тиббиёт тизими бунга дош беролмайди;

3) чартер рейсларга билетлар пуллик ва арзон эмас;

4) давлатимиз ресурсларини бизни олиб кетишга эмас, касалликка қарши курашга сафарбар қилайлик. Борганларни текшириш, қўриқлаш ва карантинда 14 кун таъминлашга ҳам ресурс керак бўлади;

5) ҳаммани олиб кетишнинг имкони йўқ. Россияда 2 миллиондан ортиқ Ўзбекистон фуқаролари мавжуд. Агар улардан 1 фоизи (20 минг) уйга кетмоқчи бўлса, камида 80 та рейс ташкил қилиш керак бўлади. Бу ҳам битта рейсда 250 та олиб келинса. Одатда бир учоқда 200 нафар одам бўлади;

6) Россия тиббиёти имкониятлари бизникидан яхшироқ. Ўзбекистон тиббиёти ходимлари ва раҳбарларини ҳурмат қилган ҳолда бу ердаги шароитлар ва тиббиёт тараққиёти даражаси яхшироқ эканини тан олишимиз керак. Худо кўрсатмасин, касаллик юқса ҳам Россияда даво топиш имконияти кўпроқ;

7) ҳужжат муаммолари ҳал бўлди. Барча регистрацияси йўқ ва муддати тугаётган фуқароларга Россия ИИВ ҳеч қандай муаммосиз регистрация муддатини 90 кунга чўзиб беради. Чегарага чиқмай патент олса ҳам бўлади. Ҳеч ким депорт қилинмайди.

P.S.: Юқоридагиларни ҳисобга олиб, келинглар, давлатни ҳам, ўзимизни ҳам қийнамайлик. Эпидемия тугагунча, шу ерда бўлиб турайлик. Ҳукуматга бизнинг ёрдамимиз шу бўлсин.

Ботиржон Шермуҳаммад, юрист

Аввалроқ Ўзбекистон Президенти Шавкат Мирзиёев хориждаги ватандошларни Ўзбекистонга қайтариш ҳақида кўрсатма берган эди.  Ташқи ишлар вазири маслаҳатчиси Жаҳонгир Хидайхўжаевнинг маълум қилишича, Россия, Туркия, Миср, Ҳиндистон, Малайзия, Жанубий Кореядан 7 та чартер рейс орқали жами 1750 дан ортиқ Ўзбекистон фуқароси ватанга қайтарилган бўлиб, улар 14 кунлик карантинга олинган.Эслатиб ўтамиз, 16 мартдан бошлаб хорижий давлатлар билан барча авиарейслар бекор қилиниб, автотранспорт воситасида Ўзбекистонга кириш-чиқиш тўхтатилди. Сўнгги маълумотларга кўра, Ўзбекистонда коронавирус билан касалланганлар 45 нафарни ташкил этмоқда.