Мудофаа вазирлиги карантинга олинган ҳудудларда назорат кучайтирилганини маълум қилди

Ўзбекистон мудофаа вазирлиги коронавирус пандемияси сабаб карантин ҳудудларида хавфсизлик ва назорат таъминлашини маълум қилди. Бу ҳақда Мудофаа вазирлиги ахборот ва оммавий коммуникациялар департаменти хабар қилган.

«Ўтган йилнинг сўнгги ойларидан бошланган коронавирус балоси бугун дунёнинг деярли барча мамалакатини ўргимчак тўри мисоли қамраб олишга улгурди. Афсуски, бу бизни ҳам четлаб ўтмади. Жорий йилнинг 15 мартда юртимизда ҳам коронавирусга чалинган беморлар мавжудлиги аниқланди.

Ушбу инфекциясининг қамрови кенгаймаслиги учун ҳукумат даражасида барча чоралар кўрилмоқда. Жумладан, барча турдаги таълим даргоҳларида вазият барқарорлашгунга қадар таътил эълон қилинди. Жамоат транспорти ҳаракати ҳам тўхтатилди ва бошқа кўплаб зарур чоралар амалга оширилди.

Ҳозирги кунда чет мамлакатларда бўлиб турган фуқароларимиз махсус чартер рейслар орқали мамлакатимизга олиб келиниб, 14 кунлик карантинда сақланмоқда. Карантинга олинган объектларда фуқаролар хавфсизлигини таъминлаш, қолаверса, тиббий назоратдаги юртдошларимизнинг ўзбошимчалик билан белгиланган ҳудудни тарк этишларининг олдини олиш мақсадида назорат чоралари кучайтирилмоқда.

Фуқароларимиз хавфсизлигини таъминлаш мақсадида бугун карантинга олинган объектларда Мудофаа вазирлиги ҳарбий хизматчилари кун-у тун ўз хизмат фаолиятини олиб бормоқда. Хавфсизликнинг бу тарзда кучайтирилиши, шубҳасиз, ҳамюртларимиз саломатлиги ва мамлакатимизнинг ушбу касалликдан талафотсиз ва тезроқ халос бўлишига замин яратади.

Карантин чора-тадбирлари белгиланган жойларда хизмат ўтаётган ҳарбий хизматчиларнинг ҳуқуқий ҳимоясини мустаҳкамлаш, аҳолига тегишли тушунтириш ишлари олиб бориш мақсадида Республика Ҳарбий прокуратураси ва Давлат хавфсизлик хизмати ходимлари мазкур объектларда бўлди. Ҳамкорликда олиб борилаётган бу каби ишлар, албатта, касалликнинг чекинишига хизмат қилади», -дейилади Мудофаа вазирлиги хабарида.

23 март ҳолатига кўра, Ўзбекистонда коронавирус билан касалланган сони 45 нафарни ташкил этмоқда. Ҳукумат 65 ёшдан ошганларга кўчага чиқмасликни тавсия қилган, жамоат жойларида ниқобсиз юриш тақиқланган, 25 мартдан бошлаб ниқобсиз юрганлар жаримага тортилади, Ўзбекистонда тиббий ниқоб танқислигини келтириб чиқарганларга ҳам қатъий чоралар кўрилиши белгиланган. Тошкентдаги барча корхона ва муассасаларга ишчиларни таътилга чиқариш ҳақида топшириқ берилган ва иш масофадан туриб ташкил этилиши мумкин. Аҳолининг кундалик эҳтиёжи инобатга олинган ҳолда деҳқон бозорлари, супермаркетлар, озиқ-овқат дўконлари, шифохоналар, поликлиникалар, дорихоналар, турли таомларни етказиб бериш хизматлари фаолияти тўхтатилмаслиги хабар қилинган.