Санитария-эпидемиологик осойишталик агентлиги директори: «Операция учун ҳам хорижга чиқишнинг ҳозирча иложи йўқ»

АОКА қошида коронавирусга қарши махсус ташкиллаштирилган штабда Санитария-эпидемиологик осойишталик агентлиги директори Баҳром Алматов аҳолидан тушган саволларга жавоб берди. Бу ҳақда «Kun.uz» хабар қилган.

Алматов жумладан бирор беморнинг чет элда операция қилиниши зарур бўлса (бошқа чора йўқ бўлса), операция учун четга чиқиш мумкинми ва бу қай тартибда амалга оширилиши ҳақида берилган саволга жавоб қайтарди.

«Хабарингиз бор, бугунги кунда халқаро авиарейслар тўхтатилган. Бошқа давлатлар ҳам касаллик қайд этилгани муносабати билан чекловлар ўрнатган. Алоҳида келишувлар бўлмаса, касалларни қабул қилиш масаласи муаммога айланган.

Шунинг учун биз даволаниш учун чет элга чиқишни тавсия этмаймиз. Республикадаги етакчи шифохоналар барча зарур асбоб-ускуналар билан таъминланган, мутахассисларимиз етарли билим ва малакага эга», – дея таъкидлаган Санитария-эпидемиологик осойишталик агентлиги директори.

22 март ҳолатига кўра, Ўзбекистонда коронавирус билан касалланган сони 43 нафарни ташкил этмоқда. Ҳукумат 65 ёшдан ошганларга кўчага чиқмасликни тавсия қилган, жамоат жойларида ниқобсиз юриш тақиқланган, 25 мартдан бошлаб ниқобсиз юрганлар жаримага тортилади, Ўзбекистонда тиббий ниқоб танқислигини келтириб чиқарганларга ҳам қатъий чоралар кўрилиши белгиланган. Тошкентдаги барча корхона ва муассасаларга ишчиларни таътилга чиқариш ҳақида топшириқ берилган ва иш масофадан туриб ташкил этилиши мумкин. Аҳолининг кундалик эҳтиёжи инобатга олинган ҳолда деҳқон бозорлари, супермаркетлар, озиқ-овқат дўконлари, шифохоналар, поликлиникалар, дорихоналар, турли таомларни етказиб бериш хизматлари фаолияти тўхтатилмаслиги хабар қилинган.