Учтепалик аёл тиббий ниқобларни тикиб, бепул тарқатмоқда (видео)

Пойтахтнинг Учтепа туманида жойлашган «Боғобод» маҳалласида истиқомат қилувчи аёл ўз ҳисобидан тиббий ниқоблар тикиб, одамларга бепул тарқатмоқда. Бу ҳақда туман ҳокимлиги матбуот хизмати хабар берди.

«Дорихоналарда тиббиёт ниқобларга танқислик юзага келди, нархлар кўтарилиб кетди. Ўзим 1000 метр марли (дока) олиб келиб, тикиб бера бошлади. Бир пайтлар ‘Фронт ортидаги фронт’ деган кинони кўргандим. Уруш маҳали ота-боболаримиз кун-у тун меҳнат қилишгани, ҳам дуода бўлишиб, ҳам ёдам беришгани эсимга тушиб кетди. Биз ҳам ҳозир коронавирусга қарши курашаяпмиз. Бир четда қараб турганимиз билан бўлмайди», — дейди аёл.

Ойдиной опанинг таъкидлашича, унинг тикувчилик борасида 35 йиллик тажрибаси бор.

Ўзбекистонда коронавирус пандемияси сабаб карантин эълон қилингач, ҳудудларда тиббиёт ниқоблари тақчиллиги кузатилди. Натижада ниқоблар нархида сунъий ўсиш юзага келди. Аввалроқ андижонлик тадбиркор кунига 20 минг дона тиббиёт ниқоби тайёрлаб, дорихоналарга 900 сўмдан етказиб бераётгани ҳақида хабар берилганди. Ўзбекистонда бир кунда 500 минг дона тиббий ниқоб ишлаб чиқарилмоқда.

Маълумот учун, Ўзбекистонда тиббий буюмлар, айнан тиббиёт ва гигиеник юз ниқобларини ишлаб чиқарувчи 20 та корхона мавжуд. Шунингдек, респиратор ниқоб ишлаб чиқарувчи корхоналар ҳам бор бўлиб, уларнинг барчасида ишлаб чиқариш қуввати кучайтирилган ва улар узлуксиз тартибда ишлаб турибди. Бундан ташқари, ишлаб чиқаришга қўшимча равишда Ўзбекистонда текстиль корхоналари ҳам докадан қатламли гигиеник ниқобларни ишлаб чиқаришни йўлга қўйган.