Самарқанд вилоят ИИБ ижтимоий тармоқларда Самарқандда тунда учрашувга чиққан йигит ва қизни ҳақоратлаб, уларни урганлиги акс этган видео юзасидан текширув ўтказиб, «самосуд»чиларни аниқлади ва нисбатан маъмурий баённома тузиб, ишни судга йўналтирди.
Таъкидланишича, 3 март куни Самарқанд шаҳар Жомий маҳалласида яшовчи қиз синглиси ҳамроҳлигида Тойлоқ туманидаги 21 ёшли йигит билан кечки сайрга чиқади. Йигит учрашувда 1996 йилда туғилган дўстининг машинасида чиққан. Биргаликда ҳаммаси Тойлоқ тумани Нурли йўл маҳалласида жойлашган, ҳозирги кунда Туркия давлатида яшаётган фуқарога тегишли уйга боришган.
Ичкаридаги шовқинни эшитган қўшнилар Қ.С., Н.А., Қ.А., Б.Ф., О.А., Х.Д.лар уйга бостириб кирган. Фуқаро Қ.С. қизларни ҳақоратлаб, юзига тарсаки уриб, ўзбошимчалик билан жазолаган. Шу вақтда қолган фуқароларнинг бир нечтаси ҳолатни видеотасвирга олиб, тунги вақтда хонадонда бақир-чақир қилади.
Ушбу ҳолатдан хабар топган маҳалла фуқаролар йиғини раиси жанжални олдини олиш мақсадида фуқароларни тарқатиб юборади.
Самарқанд вилоят ИИБ ходимларининг олиб борган дастлабки текширувлари натижасида фуқаролар Қ.С., Н.А., Қ.А., Б.Ф., О.А., Х.Д.ларга нисбатан Маъмурий жавобгарлик тўғрисидаги кодексининг 41-моддаси, 52-моддаси 2-қисми, 183-моддалари («Ҳақорат қилиш», «Енгил тан жароҳати етказиш», «Майда безорилик» билан маъмурий баённомалар тузилиб, тегишли тартибда Тойлоқ туман Маъмурий ишлар бўйича судига юборилган.
Фуқаро Қ.С. қонунни яхши билмаслигини, бу каби ҳаракатлар бошқа қайтарилмаслигини маълум қилиб, қизларни ҳақорат қилганлиги, уларга нисбатан қилган бошқа ҳаракатларидан чин кўнгилдан пушаймонлигини билдирган. Ҳолат юзасидан якуний қарорни суд органи қабул қилади.
Изоҳ (0)