Samarqand viloyat IIB ijtimoiy tarmoqlarda Samarqandda tunda uchrashuvga chiqqan yigit va qizni haqoratlab, ularni urganligi aks etgan video yuzasidan tekshiruv o‘tkazib, “samosud”chilarni aniqladi va nisbatan ma’muriy bayonnoma tuzib, ishni sudga yo‘naltirdi.
Ta’kidlanishicha, 3-mart kuni Samarqand shahar Jomiy mahallasida yashovchi qiz singlisi hamrohligida Toyloq tumanidagi 21 yoshli yigit bilan kechki sayrga chiqadi. Yigit uchrashuvda 1996-yilda tug‘ilgan do‘stining mashinasida chiqqan. Birgalikda hammasi Toyloq tumani Nurli yo‘l mahallasida joylashgan, hozirgi kunda Turkiya davlatida yashayotgan fuqaroga tegishli uyga borishgan.
Ichkaridagi shovqinni eshitgan qo‘shnilar Q.S., N.A., Q.A., B.F., O.A., X.D.lar uyga bostirib kirgan. Fuqaro Q.S. qizlarni haqoratlab, yuziga tarsaki urib, o‘zboshimchalik bilan jazolagan. Shu vaqtda qolgan fuqarolarning bir nechtasi holatni videotasvirga olib, tungi vaqtda xonadonda baqir-chaqir qiladi.
Ushbu holatdan xabar topgan mahalla fuqarolar yig‘ini raisi janjalni oldini olish maqsadida fuqarolarni tarqatib yuboradi.
Samarqand viloyat IIB xodimlarining olib borgan dastlabki tekshiruvlari natijasida fuqarolar Q.S., N.A., Q.A., B.F., O.A., X.D.larga nisbatan Ma’muriy javobgarlik to‘g‘risidagi kodeksining 41-moddasi, 52-moddasi 2-qismi, 183-moddalari (“Haqorat qilish”, “Yengil tan jarohati yetkazish”, “Mayda bezorilik” bilan ma’muriy bayonnomalar tuzilib, tegishli tartibda Toyloq tuman Ma’muriy ishlar bo‘yicha sudiga yuborilgan.
Fuqaro Q.S. qonunni yaxshi bilmasligini, bu kabi harakatlar boshqa qaytarilmasligini ma’lum qilib, qizlarni haqorat qilganligi, ularga nisbatan qilgan boshqa harakatlaridan chin ko‘ngildan pushaymonligini bildirgan. Holat yuzasidan yakuniy qarorni sud organi qabul qiladi.
Izoh (0)