Сайёҳлик компаниялари, жамоат ташкилотлари ва йирик саноат корхоналарига Ўзбекистонда коронавирус тарқалиши билан боғлиқ вазият барқарор ҳолатга келгунга қадар ички туризмни ривожлантиришга доир тадбирларни тўхтатиш тавсия этилади. Бу ҳақда Вазирлар Маҳкамасининг Республика махсус комиссияси қарорига таяниб, Туризмни ривожлантириш давлат қўмитаси хабар берди.

Фото: «Дарё»

Шу билан бирга, республика ҳудудида ўтказилиши режалаштирилган барча турдаги оммавий байрам тадбирлари, халқаро тадбирлар ва спорт мусобақалари, театр, кино ва концерт дастурлари вақтинча тўхтатилади.

Махсус комиссия қарорига асосан, Транспорт вазирлиги карантин муддати даврига тўғри келувчи туризм мақсадида харид қилинган ҳаво ва темир йўл чипталарини, шу жумладан, ички қатновлар учун чипталарни харидорлар томонидан қайтарилган тақдирда, жаримасиз қабул қилиш, чипта нархини харидорга тўлиқ қайтариш ёки бошқа муддатга кўчириш чораларини кўради.

Ўзбекистон Транспорт вазирлиги, Туризмни ривожлантириш давлат қўмитаси, Ташқи ишлар вазирлиги, Ахборот технологиялари ва коммуникацияларини ривожлантириш вазирлиги ҳамда мутасадди вазирлик ва идоралар билан биргаликда айни дамда мамлакатда бўлиб турган хорижий фуқароларни, шу жумладан, туристларни ўз мамлакатларига қайтиши масалаларида уларга ахборот кўмагини берувчи махсус штаб ташкил этилди.

Аввалроқ коронавирус сабабли Тошкентда 23—25 апрель кунлари бўлиб ўтиши режалаштирилган Tashkent Law Spring II халқаро юридик форуми кейинга қолдирилганди. Шунингдек, биринчи Тошкент халқаро инвестиция форуми коронавирус сабабли 2020 йилнинг кузига қолдирилган эди. Ўзбекистонда халқаро тадбирлар ва спорт мусобақалари вақтинча тўхтатилди.

Эслатиб ўтамиз, Ўзбекистонда коронавирусга чалинганлар сони 13 нафарга етди. Uzbekistan Airways авиакомпанияси ўнлаб шаҳарларга парвозларни бекор қилган.