Англия Премьер Лигаси чемпионат жорий мавсумидаги қолган ўйинларни ёпиқ ва нейтрал стадионда ўтказиш масаласини кўриб чиқмоқда.
The Sun нашрининг хабар қилишича, ташкилот мавсумнинг қолган 92 ўйинини томошабинсиз ва нейтрал майдонда ўтказмоқчи. Учрашувларнинг барчаси Мидлендсда бўлиб ўтиши мумкин. Бир кунда бир нечта ўйинлар ўтказилиши эҳтимолдан холи эмас, жамоалар эса ҳар уч кунда бир марта ўйин ўтказади.
Шунингдек, бу стадиондаги тиббиёт ходимлари ва полициячиларнинг ишини камайтиради. Мухлислар ПСЖ—«Боруссия Д» учрашувида бўлгани каби стадион атрофига йиғила олмайди. Ўз навбатида барча учрашувлар жонли эфирга узатилади.
Эслатиб ўтамиз, коронавирус пандемияси туфайли юзага келган вазиятдан кейин кучли бешлик лигаларида ўйинлар тўхтатилди. Аввалроқ УЕФА Евро—2020 мусобақасини 2021 йилга қолдирди, бу эса лигаларга мавсумни тугатиб олиш имкониятини яратади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)