АПЛда февраль ойининг энг яхши футболчиси ва мураббийи маълум бўлди

Англия Премьер Лигасининг февраль ойидаги энг яхши ўйинчиси ва мураббийи номи маълум қилинди.

Унга кўра, «Манчестер Юнайтед» ярим ҳимоячиси Бруну Фернандеш февраль ойининг энг яхши ўйинчиси номига лойиқ кўрилди. Жамоа сафига январда келиб қўшилган футболчи бу ном учун курашда Маркос Алонсо («Челси»), Пьер-Эмерик Обамеянг («Арсенал»), Доминик Калверт-Люин («Эвертон»), Мэтт Доэрти («Вулверҳэмптон») ва Ник Поуп («Бёрнли») каби футболчиларни ортда қолдирган.

Фернандеш февраль ойида Премьер Лигада учта ўйин ўтказиб, бир гол ва иккита самарали узатмага муаллиф бўлди. Унинг жамоаси бу ўйинларда бир дуранг ва икки ғалабага эришди.

https://twitter.com/premierleague/status/1239869085158002688

«Бёрнли» устози Шон Дайч эса АПЛда февраль ойининг энг яхши мураббийига айланди. 48 ёшли мутахассис ўз фаолиятида иккинчи марта ушбу совринга эга чиқди.

Дайч бу борада Микель Артета («Арсенал»), Оле-Гуннар Сульшер («Манчестер Юнайтед») ва Крис Уайлдерни («Шеффилд Юнайтед») ортда қолдирган.

Февраль ойида «Бёрнли» Англия чемпионатида мағлубиятга учрамади. Дайч шогирдлари «Арсенал» (0:0), «Ньюкасл» (0:0) ва «Тоттенҳэм» (1:1) каби жамоалар билан дуранг ўйнади, шунингдек икки ўйинда ғалаба қайд этилди: «Саутҳэмптон» (2:1) ва «Борнмут» (3:0).