Пандемия даражасига етган коронавирус сабаб дунё бўйлаб спорт мусобақаларининг қолдирилиши, бекор қилиниши давом этмоқда. Қуйида бу борадаги сўнгги маълумотлар тақдим этилади.
Коронавирус ва футбол
Евро—2020 бўлмайди
УЕФА ташкилоти 17 март, сешанба куни, минтақа ассоциациялари билан видеоконференция шаклида мажлис ўтказиб, унда футбол бўйича Евро—2020 мусобақасини 2021 йилга кўчириш борасида қарор қабул қилди. Энди Евро—2020 мусобақаси йўқ, аксинча, ҳар 4 йилда бир марта ўтказиладиган мусобақаси 2021 йилнинг 11 июнидан 11 июлигача ўтказилади. Ва у Евро—2021 бўлади.Эслатиб ўтамиз, Евро—2020 мусобақаси тарихда илк бор Европанинг 12 та шаҳрида 12 июндан 12 июлга қадар ўтиши режалаштирилганди.
Копа Америка—2020 ҳам қолдирилди
Жанубий Америка қитъасининг энг нуфузли мусобақаларидан бири Копа Американинг 2020 йилги мусобақаси ҳам коронавирус сабаб қолдирилди. Аргентина ва Колумбия мезбонлик қилиши лозим бўлган мусобақа 2020 йилнинг 12 июнидан 12 июлига қадар бўлиб ўтиши керак эди. Тарихда 47-бор ўтказиладиган мусобақада ОФК вакиллари бўлмиш Австралия ва Қатар терма жамоаси ҳам иштирок этиши кўзда тутилганди.Бироқ ушбу мусобақа ҳам 2021 йилга қолдирилди. Ҳозирча унинг санаси расман эълон қилингани йўқ.Мавзуга доир: Копа Америка—2020 мусобақасига қуръа ташланди
Коронавирус Беларусга чўт эмас
Беларусь футбол федерацияси коронавирус пандемиясига қарамай футбол бўйича 2020 йилги мамлакат чемпионати ўз вақтида бошланишини эълон қилди. Қайд этиш жоиз, чемпионатнинг янги мавсуми 19 март куни старт олади. Стадионларга мухлислар киришига чеклов қўйилмайди.Маълумот учун айни дамда Европанинг кучли бешлик чемпионатларида баҳслар пандемия сабаб тўхтатиб қўйилган. Ўзбекистонда ҳам Суперлига баҳслари 3-турдан сўнг номаълум муддатга тўхтатилди. Шунингдек, Россия Премьер Лигаси ҳам 22-турдан сўнг тўхтатилгани эълон қилинди.
Клублар машғулотларни бекор қилмоқда, футбол олами вакиллари вирус билан касалланишда давом этмоқда
ПСЖ, «Манчестер Юнайтед», «Монако» клублари машғулотларни тўхтатганини эълон қилди.Коронавирус билан оғриган футбол олами вакиллари рўйхати кенгаймоқда: Даниэле Ругани, Евангелос Маринакис, Микель Артета, Каллум Ҳадсон-Одои, Эсекел Гарай, Элиаким Мангаля, Хосе Луис Гайя. Ҳадсон-Одоининг аллақачон тузалгани айтилмоқда. 17 март куни эса «Фламенго» устози, 65 ёшли Жорже Жезушда ҳам вирус аниқлангани маълум бўлди. Шунингдек, пандемия Япония футбол ассоциацияси президенти, 62 ёшли Козо Ташимани ҳам четлаб ўтмаган.
Маълумотларга кўра, «Валенсия» клуби вакилларининг 35 фоизида коронавирус тести натижалари ижобий кўриниш берган. Айни дамда клубда карантин эълон қилинган. Германиянинг «Ҳерта» клуби футболчиси ҳам вирусни юқтириб олган, клуб ҳам икки ҳафталик карантин эълон қилди.
Ҳа айтганча, А Серия клублари чемпионат баҳслари номаълум муддатга тўхтатилгани боис ўйинчиларга бу вақтда маош бермаслик вариантини илгари сураётгани айтилмоқда.
Коронавирус бокс ва MMA’га қарши
Пандемия сабаб UFC промоушени томонидан 21, 28 март ҳамда 4 апрелда ўтиши керак бўлган мусобақалар бекор қилинди. Ҳозирча 19 апрель куни ўтиши режалаштирилган UFC 249 мусобақаси бекор қилингани йўқ. Ушбу жанг оқшомининг асосий кардида Ҳабиб Нурмагомедов ҳамда Тони Фергюсон жанг қилади. Фақат ушбу жанг аввал режа қилинганидек, Лас-Вегасда ўтмаслиги аниқ. Боиси шаҳарда ҳар қандай оммавий тадбирларга чеклов ўрнатилган. Ҳозирча ушбу жангнинг Дубайда ўтиши мумкинлиги ҳақида хабарлар пайдо бўлмоқда.Ковалёв—Баррера, Бетербиев—Мэнг жанглари бекор қилинди
Профессионал бокснинг ярим оғир вазн тоифасида (-79,3 кг) ўтиши режалаштирилган Сергей Ковалёв ва Салливан Баррера ўртасидаги жанг бекор қилинди. Ушбу жанг 25 апрель куни АҚШнинг Индио шаҳрида бўлиши лозим эди. Ушбу жанг оқшомида рингга чиқиши кутилган япониялик енгилмас боксчи Наоя Инуэ ҳам Жон Каземирога қарши жангни бошқа муддатда ўтказиши таъкидланди.
Ярим оғир вазн тоифасида WBC, IBF камарлари соҳиби Артур Бетербиевнинг 28 март куни Фанлунг Мэнгга қарши ўтиши режалаштирилган жанги ҳам вирус сабаб бекор қилинди.
Сауль Альвареснинг жанги ҳам бўлмайди
2 май куни Лас-Вегасда профессионал бокснинг ўрта вазн тоифасида ўтиши режалаштирилган ушбу вазндаги WBA чемпиони Сауль Альварес ҳамда суперўрта вазндаги WBO чемпиони Билли Жо Сандерс ўртасидаги жанг ҳам бўлмаслиги эълон қилинди.
Изоҳ (0)