Давлат солиқ қўмитаси раиси Беҳзод Мусаев карантин вақтида Ўзбекистонда бозорлар ёпилмаслигини маълум қилди.
Энг муҳими, биринчи навбатда, ваҳимага тушмаслик. Ўтган икки ой давомида бирор бир маҳсулотга нарх ошдими? Ёки нарх ошишига бирор омил таъсир қилдими? Ҳеч қандай таъсир бўлгани йўқ.Шунингдек, Солиқ қўмитаси раиси ҳар бир ҳудудда озиқ-овқат маҳсулотларини оширилган нархларда сотилишининг олдини олишга қаратилган тезкор профилактик чораларнинг кўрилишини шахсан назоратга олганлигини ва мурожаатлар эътиборсиз қолмаслигини кафолатлаган.Солиқ органлари ва прокуратура ҳузуридаги департамент ходимлари билан биргаликда доимий асосда ишлайдиган махсус штаб тузилади ва ҳар бир бозордаги вазият назоратга олинади.
Шукур қилиб айтишимиз керак, Ўзбекистон озиқ-овқат маҳсулоти билан ўзини-ўзини таъминлай оладиган мамлакат. Гўшт маҳсулоти бўладими, полиз маҳсулотими, ҳамма маҳсулотлар ҳеч қандай муаммо бўлмаслиги керак.
Одамларимиз ваҳимага тушмаслик учун айтмоқчиманки, ҳукумат томонидан бундай вазият доимий асосда назоратга олиб борилади. Нафақат Тошкентда, балки ҳудудлардаги бозорларда ҳам. Бирорта бозор, бирорта савдо дўкони, бирорта овқатланиш шохобчаси ёпилишига йўл қўйилмайди. Бозорларимиз жуда ҳам тўкин-сочин.
Беҳзод Мусаев, Давлат солиқ қўмитаси раиси
«Агар мурожаатингиз бўлса, Давлат солиқ қўмитасининг 24 соат мобайнида фаолият олиб бораётган Call маркази (1198) ва «Ишонч телефони»га (71) 244 – 98- 98 боғланишингиз мумкин», — дейилади хабарда.
Изоҳ (0)