Франция президенти Эммануэль Maкрон COVID-19 коронавирусининг тарқалиши сабаб 16 мартдан бошлаб мамлакатдаги барча таълим муассасаларини ёпиш бўйича топшириқ берди, деб хабар қилади Le Figaro газетаси.
Хусусан, гап боғча, мактаб, коллеж, лицей ва университетлар ҳақида кетмоқда. Maкроннинг таъкидлашича, 62 минг таълим муассасаси ёпилади. «Бир неча ҳафтадан буён мамлакатимиз вирус тарқалишига дуч келмоқда. Ушбу эпидемия сўнгги юз йил ичида соғлиқни сақлаш соҳасидаги энг жиддий инқирозга айланди», — дейди Франция президенти.
У эпидемияни тўхтатиш учун давлат барча керакли чораларни кўришини айтиб, инсон соғлиғи бебаҳо эканлигини таъкидлаган. Франция президенти сурункали касаллар ва нафас олиш тизимидан азият чекувчиларни, шунингдек, қария ва ногиронлиги бўлган шахсларни иложи борича уйдан чиқмасликка чақирди.
Сўнгги маълумотларга кўра, Францияда коронавирус билан касалланганлар сони 2876 кишига етган. Касаллик оқибатида вафот этганлар сони 61 кишини ташкил этмоқда.
Мавзуга доир:
Изоҳ (0)