Зоир Мирзаев вилоят ҳокими сифатида Деҳқонобод туманига биринчи ташрифида вилоят бошқармаларида фаолият юритаётган деҳқонободлик раҳбарларга ўзи туғилиб ўсган қишлоқ учун кутубхона қуриб бериш таклифини берганди. Деҳқонободнинг тоғли қишлоғида биринчи кутубхона иш бошлади, деб хабар беради «Дарё» мухбири.
Зоир Мирзаев 2019 йил 26 октябрь куни Қашқадарё вилоятига ҳоким этиб тайинлангач, шу йилнинг 6 ноябрь куни Деҳқонобод туманига борганди. Вилоят ҳокими Деҳқонобод Калий заводида вилоят ташкилоти раҳбарлари билан мулоқотида вилоятда ишлаётган деҳқонободлик раҳбарларга ўзи туғилиб ўсган қишлоқда ўғирланган пулга эмас, ўз номига олинган кредит маблағига кутубхона қуриш талабини қўйганди.
Қашқадарё ҳудудий электр тармоқлари корхонаси раҳбари Анвар Музапов мазкур топшириққа асосан, Қолувдор қишлоғида 50 миллион сўм маблағ эвазига қишлоқ ёшлари учун кутубхона қуриб берди. Шунингдек, кутубхонага 500 дона китоб ҳам совға қилди.
«Деҳқонободлик ёшлар бу ғамхўрликка муносиб жавоб беришига ишонамиз ва биз уларни қўллаб-қувватлаймиз. Мактаб ўқувчилари учун футбол майдони, қишлоқ аҳли учун тиббиёт маркази қуриб берамиз. Аҳолини қийнаб келаётган ичимлик суви муаммосини ҳам ҳал этамиз», — деди кутубхона очилишида иштирок этган вилоят ҳокими Зоир Мирзаев.
«Дарё» мухбирининг қўшимча қилишича, Деҳқонобод туманида «Ҳар бир ёшга — бир гектар» лойиҳаси бўйича 152 нафар ёшга 1 гектардан ер ҳам берилган. Қизилча қишлоғида давом этган тадбирда Деҳқонобод ҳокими Зоир Алиқулов ҳам 100 нафар ёшга ер бериб, писта, бодом кўчатларини экиш сирларини ўргатган.
Зоир Мирзаевнинг Деҳқонободга ташрифи сўнгида Ингичка қишлоғига борадиган йўлни таъмирлаш учун маҳаллий бюджетдан маблағ ажаратишга келишиб олинди.
Изоҳ (0)