Ўзбекистон истеъмолчилар ҳуқуқларини ҳимоя қилиш федерацияси расмий сайтида ички бозорда автомобиль нархлари кўтарилишига муносабат билдирилди.
«Бугунги кунда истеъмолчилар автомашиналар нархлари кўтарилганидан норози. Бир ёки икки фоизга эмас, бирданига 15-20 фоизга! Нима сабабдан? Қайси омиллар туфайли? Нега айнан харидоргир бўлган автомашиналарнинг нархи тушиш ўрнига кўтарилиб кетгани кўпчилик истеъмолчиларнинг норозилигига сабаб бўлмоқда. Берилган ваъдалар аксинча эди.
Бу йил автомашина нархи тушиши кутилаётган эди. Бу иш билан UzAutoMotors истеъмолчилар устидан яна бир «аҳмоқона юриш қилди». Ўзбекистон Истеъмолчилар ҳуқуқларини ҳимоя қилиш жамиятлари федерациясига 2019 йил давомида юзга яқин ранги ўчганидан тортиб, ўз жойида турган, ҳеч қандай ташқи омилларсиз ўз-ўзидан ёниб кетган машиналар тўғрисида аризалар келиб тушган.
Биз низомда белгиланган тизим орқали истеъмолчиларимизга кўмак кўрсатган бўлишимизга қарамасдан, муаммолар кўпайса кўпайдики, асло камаймади. UzAutoMotors монопол ташкилот ҳисобланар экан, бу каби муаммоларнинг адоғи бўлмаслиги аниқ.
Тўғри, халқимиз меҳнаткаш, орзу-ҳавас учун ҳам машина олиш иштиёқидан асло қайтмайди. Лекин бу дегани исталганча халқ билан ҳисоблашмасдан нархларни ошириш керак дегани эмас! Бу кетишда халқимиз анча пайт мусофир юртда «қора ишчи» деган тамға билан юришга маҳкум.
Тўғри-да, ўз давлатида қадр топмаган халқни ўзга юртда бошини силармиди?! Қачонгача ўзга юртда яратилган имкониятларга ҳавас қилиб юрамиз? Қачонки, UzAutoMotors’дан ташқари яна рақобатдош заводлар иш бошласа, шундагина нархнинг тушишидан умид бор. Акс ҳолда халққа нисбатан бундай беписанд ва таҳқирловчи кайфият ҳали-бери уларни тарк этмайди», — дейилади муносабатда.
Федерация истеъмолчиларни ҳам ўз ҳақ-ҳуқуқларини ҳимоя қилишга чақиради:
«Гапимиз ниҳоясида истеъмолчиларимиздан шуни илтимос қилардикки, қўйилган баҳога кўниб кетаверманг. Юртбошимиз ҳам ‘Жамият — ислоҳотлар ташаббускори’ деб бекорга айтмаган. Халқ манфаати ўйланмас экан, уни талаб қилиш ҳуқуқига тўлақонли ҳақлимиз. Халқдек қудратли куч бўлмайди’.
UzAuto Motors компанияси 9 март, душанба куни, ўзи ишлаб чиқараётган (йиғаётган) енгил автомобиллар нархи модел ва модификацияга қараб 3 фоиздан 21 фоизгача оширган эди. Компания ушбу ҳолатни «нархларни қайта кўриб чиқиш қарори нархлар конюнктураси, шунингдек, ички ва ташқи бозордаги умумий макроиқтисодий вазиятнинг ўзгариши билан боғлиқ», деб изоҳлади.
Аввалроқ Олий Мажлис Қонунчилик палатаси депутати Мақсуд Қурбонбоев UzAuto Motors мутасаддиларидан автомобиль нархларининг оширилиши юзасидан тушунтириш сўраб, «Нархлар қайси омиллар туфайли ошганини истеъмолчи билишга ҳақи борми ёки йўқми?», деб айтганди.
Изоҳ (0)