Россия ва Нефть экспорт қилувчи давлатлар ташкилоти (ОПЕК) келишуви бузилиши шароитида жаҳонда нефть нархининг пасайиши тезлашиб кетди. Келишув 1 апрелда ўз кучини йўқотади ва ишлаб чиқарувчи давлатлар чекловларсиз нефть қазиб олиш имконига эга бўлади. Brent маркали нефть нархи 9 март, душанба, куни аввалги минимумидан ўтиб, бир баррели учун 31,38 долларгача тушиб кетди. WTI маркасидаги нефтнинг нархи эса 31,35 фоизга тушиб, баррели учун 28,33 долларга етган. Brent фючерс маркасидаги нефтнинг нархи 28,69 фоизга арзонлашиб, бир баррели 32,28 долларга баҳоланган.
Иқтисодий ривожланиш маркази директори, таниқли иқтисодчи Юлий Юсупов «Kun.uz» нашрига берган интервьюсида ушбу жараёнларнинг Ўзбекистон иқтисодиётига қандай таъсир қилиши борасидаги фикрлари билан ўртоқлашган.
«Қозоқ тенгеси курси ҳам тушиб кетиши эҳтимоли бор. Россия ва Қозоғистон Ўзбекистоннинг энг йирик харидорларидир, шунингдек,улар ўзбекистонлик ташқи меҳнат муҳожирларидан маблағ келадиган мамлакатлар ҳисобланади», — деди у.
Юлий Юсуповнинг фикрича, нефть нархи, рубл ва қозоқ тенгеси курсларининг пасайиши сезиларли бўлса ва узоқ вақт давом этса, ушбу давлатлар иқтисодиётига экспорт ва меҳнат муҳожирларидан тушадиган валюта тушуми камаяди.
«Мамлакатда валюта камайса, сўм курси ҳам туша бошлайди, доллар нархи эса табиий равишда кўтарилади. Яъни агар нефть нархининг пасайиши жиддий кечса ва узоқ вақт давом этса, сўмнинг девальвацияси муқаррардир», — дея хулоса қилган иқтисодчи.
Ўзбекистон Республикаси Марказий банки 10 мартдан амал қиладиган сўмнинг хорижий валюталарга нисбатан янги курсларини белгилаган. Унга кўра 1 АҚШ доллари 13,30 сўмга арзонлашиб, 9500,54 сўмни ташкил этган.
Умуман олганда, долларнинг сўмга нисбатан қиймати кетма-кет олти ҳафта давомида тушмоқда.
Нефть нархининг пасайиши дунёнинг кўплаб мамлакатларига, жумладан Россия иқтисодиётига жиддий таъсир кўрсатган, нефть нархининг тушиши оқибатларига қарши курашиш учун Қозоғистонда махсус штаб тузилган. АҚШда эса биржалардаги савдолар 7 фоизлик пасайиш сабабли тўхтатилган.
Изоҳ (0)