Тошкентда 8 март — Халқаро хотин-қизлар куни муносабати билан 7 март, шанба куни байрам тадбири бўлиб ўтди. Унда Президент Шавкат Мирзиёев иштирок этиб, нутқ сўзлади, дея хабар бермоқда Президент матбуот хизмати.
Президент ўз нутқида Ўзбекистонда аёл раҳбарлар — вазирлар, ҳокимлар, ишлаб чиқариш бирлашмалари, банк ва компаниялар раислари, ҳуқуқ-тартибот идораларида, Қуролли Кучлар таркибида масъул вазифаларда хизмат қилаётган хотин-қизлар сони ортиб бораётганини алоҳида таъкидлади (давлат ва жамоат ташкилотлари тизимида раҳбарлик лавозимларидаги хотин-қизлар сони 1 380 нафардан ошган), Ўзбекистон миллий парламенти тарихида биринчи марта аёл киши — Танзила Норбоева Сенат раиси этиб сайланганини эслатиб ўтди (бундан ташқари, парламент қуйи палатасидаги 150 депутатнинг 32 фоизи аёллар).
Шунингдек, Шавкат Мирзиёев яқинда «ташаббускор ва ташкилотчи аёлларнинг муносиб вакиллари ғоят масъулиятли вазифага — туман ва шаҳар ҳокими лавозимларига тайинланган»ликларини ҳам алоҳида эътироф этди. Эслатиб ўтамиз, Андижоннинг Бўстон туманига Садбархон Мамитова, Бухоронинг Олот туманига Наргиза Неъматова, Наманганнинг Тўрақўрғон туманига Зулайҳо Маҳкамова, Самарқанднинг Каттақўрғон шаҳрига Гавҳар Алимова, Сирдарёнинг Боёвут туманига Дилфуза Ўролова, Қашқадарёнинг Қарши туманига Мақсуда Мустафоева биринчи раҳбар этиб тасдиқланган эди.
«Эл-юртимизнинг катта ишончини қозонган бу опа-сингилларимиз бугунги анжуманда иштирок этмоқдалар. Уларнинг барчасини самимий табриклаб, ишларига ютуқ ва омадлар тилашга ижозат бергайсиз», — дея, Президент Шавкат Мирзиёев аёл ҳокимларни алоҳида қутлади.
Изоҳ (0)