Toshkentda 8-mart — Xalqaro xotin-qizlar kuni munosabati bilan 7-mart, shanba kuni bayram tadbiri bo‘lib o‘tdi. Unda Prezident Shavkat Mirziyoyev ishtirok etib, nutq so‘zladi, deya xabar bermoqda Prezident matbuot xizmati.
Prezident o‘z nutqida O‘zbekistonda ayol rahbarlar — vazirlar, hokimlar, ishlab chiqarish birlashmalari, bank va kompaniyalar raislari, huquq-tartibot idoralarida, Qurolli Kuchlar tarkibida mas’ul vazifalarda xizmat qilayotgan xotin-qizlar soni ortib borayotganini alohida ta’kidladi (davlat va jamoat tashkilotlari tizimida rahbarlik lavozimlaridagi xotin-qizlar soni 1 380 nafardan oshgan), O‘zbekiston milliy parlamenti tarixida birinchi marta ayol kishi — Tanzila Norboyeva Senat raisi etib saylanganini eslatib o‘tdi (bundan tashqari, parlament quyi palatasidagi 150 deputatning 32 foizi ayollar).
Shuningdek, Shavkat Mirziyoyev yaqinda “tashabbuskor va tashkilotchi ayollarning munosib vakillari g‘oyat mas’uliyatli vazifaga — tuman va shahar hokimi lavozimlariga tayinlangan”liklarini ham alohida e’tirof etdi. Eslatib o‘tamiz, Andijonning Bo‘ston tumaniga Sadbarxon Mamitova, Buxoroning Olot tumaniga Nargiza Ne’matova, Namanganning To‘raqo‘rg‘on tumaniga Zulayho Mahkamova, Samarqandning Kattaqo‘rg‘on shahriga Gavhar Alimova, Sirdaryoning Boyovut tumaniga Dilfuza O‘rolova, Qashqadaryoning Qarshi tumaniga Maqsuda Mustafoyeva birinchi rahbar etib tasdiqlangan edi.
“El-yurtimizning katta ishonchini qozongan bu opa-singillarimiz bugungi anjumanda ishtirok etmoqdalar. Ularning barchasini samimiy tabriklab, ishlariga yutuq va omadlar tilashga ijozat bergaysiz”, — deya, Prezident Shavkat Mirziyoyev ayol hokimlarni alohida qutladi.
Izoh (0)