Quacquarelli Symonds дунёнинг энг яхши университетлари рейтингини эълон қилди. Унда Ўзбекистондан бирорта ОТМ йўқ

Дунё университетларининг рейтингини тузувчи QS (Quacquarelli Symonds) агентлиги 2020 йил учун энг яхши университетлар рейтингини эълон қилди. Унда умумий ҳисобда бутун дунёда жойлашган 1000 та олий ўқув юртлари жой олган.

Рейтингнинг дастлабки 3 та поғонасини АҚШ университетлари эгаллаган (Massachusets Institute of Technology, Stanford University, Harvard University). Тўртинчи ўрин Буюк Британиянинг University of Oxford’га насиб этган.

Quacquarelli Symonds рейтингидан Россиядан 25 та, Қозоғистондан 10 та ОТМ ўрин олди. Ўзбекистоннинг эса бирорта олий ўқув юрти жой олмади.

Ўзбекистон ОТМлари Буюк Британиянинг Times Higher Education томонидан 2019 йилнинг декабрида тузилган рейтингдан ҳам, 2020 йилнинг февраль ойида тузилган рейтингидан ҳам ўрин олмаганди.

Эслатиб ўтамиз, 2019 йилнинг октябрида Президент Шавкат Мирзиёев 2030 йилгача олий таълим тизимини ривожлантириш концепциясини тасдиқловчи қарорга имзо чеккан эди. Унга кўра Ўзбекистон Миллий университети ва Самарқанд давлат университетинини илғор университетларга айлантириш ва улардаги таълим даражасини дунёнинг 500 та энг яхши университетлари қаторига қўшиш режалаштирилган.