Жаҳон банки дунёнинг 60 га яқин давлатида тарқалган янги турдаги COVID-19 коронавирусига қарши курашиш учун 12 миллиард доллар йўналтиради, деб хабар берди банк матбуот хизмати.
Ушбу маблағлар соғлиқни сақлаш тизимини мустаҳкамлаш, тиббий хизматлардан фойдаланиш имкониятларини яхшилаш ва ривожланаётган мамлакатларда кузатувни кучайтиришга йўналтирилади.
Жаҳон банки президенти Дэвид Малпасснинг сўзларига кўра, ташкилот ривожланаётган мамлакатларнинг коронавирус тарқалишига қарши курашиш эҳтиёжларига тез ва мослашувчан жавоб беришга тайёр туриши учун ишламоқда.
«Бу фавқулодда молиялаштириш, сиёсат бўйича маслаҳат ва техник ёрдамни ўз ичига олади», — дейди Малпасс.
Банк хабарида таъкидланишича, ушбу ташкилот касаллик тарқалиш хавфи юқори бўлган қашшоқ мамлакатларга кўпроқ эътибор қаратади.
Аввалроқ Европа иттифоқи коронавирусга қарши кураш учун 232 миллион евро ажратиши ҳақида хабар берилганди.
Февраль ойининг бошида АҚШ коронавирус қайд этилган Хитой ва бошқа мамлакатларга 100 миллион доллар ажратиши маълум қилинган эди. Хитой Молия вазирлиги эса коронавирусга қарши курашиш учун қарийб 3,9 миллиард доллар миқдорида маблағ ажратди. Қозоғистон эса мазкур вирус билан курашиш учун 9,2 миллион доллар маблағ ажратганини маълум қилди.
Шунингдек, Билл Гейтс Хитойдаги коронавирус билан курашишга 5 миллион доллар ажратди. Dell, PepsiCo ва Microsoft Хитойда коронавирусга қарши курашишда ёрдам беришини маълум қилди. Хитойлик актёр Жеки Чан коронавирусга қарши вакцина яратган инсонга 143 минг доллар ваъда қилди.
Изоҳ (0)