Ўзбекистонда хизмат кўрсатган артист Мирзабек Холмедов «Дарё» интернет-нашри учун эксклюзив интервью берди. Интервьюни журналист Феруз Муҳаммад ташкиллаштирди.
Мирзабек Холмедов суҳбат давомида «‘Мирзо’ театри тарқалди» мазмунидаги гап-сўзларга ойдинлик киритди.
‘Мирзо’ театри тарқалиб кетди, деган гапларга келсак, энди мен уларни ҳеч қачон бир жойда, битта бинода ёки ҳужжатда рўйхатда ушлаган эмасман. Концерт қиладиган бўлсак, 4-5 ой олдин йигитлар келиб фикрларини айтиб, ижодларини кўрсатиб концертга тайёргарлик кўрилар эди.Биз кўпроқ театрлаштирилган томоша қўйишга ҳаракат қилдик. Мана Аваз Охун, у ҳам бизнинг театримиз йигити бўлган. Ҳаммалари халқнинг хизматини қилиб юришибди. Лекин мен энди ‘Мирзо’ театри бўлиб эмас, насиб қилса, Худо умр берса, кейинчалик бир ўзим чиқиб, халққа хизмат қилиш ниятим йўқ эмас.
‘Мирзо’ театри бўлиб, болаларни бирлаштириб концерт қўйишимиз мумкин, аммо ўзимизнинг шахсий режаларимиз бор. Концерт қилиш ҳам ўзи эмас. Концертнинг харажати ҳам ташкилотчи, ҳам ижодкорлар ўртасида тенг тақсимланар эди.
Одамлар бир фикрдан қочишсин, ‘концерт берди, тўрт мингдан ортиқ одам тушди, жуда кўп пул тушди’, дейишмасин. Энг ёмон нарса бировнинг пулини санаш, баракасини берсин, десангиз Худо сизга ҳам беради. Биринчидан, реклама осон иш эмас, телевидениеда, радиода реклама қилиш жуда катта харажат талаб қилади. Кейин концерт қўйиш ўзи осон иш эмас, ярим йил тайёргарлик кўрилади. Асаб бузарлик, уйқусизлик, қолаверса, шунча одамнинг бошини бир қилиб концерт қўйиш осон иш эмас.
Мирзабек Холмедов, Ўзбекистонда хизмат кўрсатган артист
Изоҳ (0)