Европанинг жорий йилдаги энг яхши автомобили номи маълум бўлди

Peugeot 208 иккинчи авлод хетчбеки ҳар йили ўтказиладиган «Европанинг энг яхши автомобили» танлови ғолибига айланди, деб хабар беради Motor.

Европанинг 23 давлатидан бўлган 60 нафар журналистдан иборат ҳакамларнинг овоз бериш жараёнларига кўра, Peugeot 208 маркаси 281 балл тўплаган. Ушбу автомобиль иккинчи ўринни қўлга киритган Tesla Модель 3 электрокарини 39 баллга ортда қолдирди.

Учинчи ўрин эса Porsche Taycan электромобилига (222 балл) насиб этди. Тўртинчи поғонадан Renault Clio хетчбеки (211 балл) ўрин олган бўлса, кучли бешликка Ford Puma (209 балл) якун ясади. Ундан кейинги ўринларни Toyota Corolla (152 балл) ва BMW 1-Series (133 балл) эгаллади.

Ўтган йили Европанинг энг яхши автомобили Jaguar I-Pace’га насиб этган. Унга қадар Volvo ХC40, Opel Astra, Volkswagen Passat ва Golf моделлари ҳам ушбу номга сазовор бўлган.