Олий Мажлис Сенати Бюджет ва иқтисодий ислоҳотлар масалалари қўмитасининг 27 февраль, пайшанба куни, бўлиб ўтган навбатдаги мажлисида Қонунчилик палатаси Кенгаши ҳамда Сенат Кенгашининг 2019 йил 14 сентябрдаги қўшма қарори билан тасдиқланган «Тўйлар, оилавий тантаналар, маърака ва маросимларнинг ихчам ўтказилишини таъминлаш бўйича чора-тадбирлар дастури»га асосан тайёрланган қонун кенг муҳокама қилинди.
Йиғилишдан сўнг Вазирлар Маҳкамаси бош мутахассиси Ғиёсиддин Режабов ОАВ вакилларигаинтервью бераркан, у тўйхоналар соддалаштирилган тартибда бошқа фаолият турларига қайта ихтисослаштирилиши кутилаётганини қайд этди.
«Тўйхона 500 ёки 1000 кишилик бўлса, уни бузиб, қайтадан 250 кишиликка мослаб қуриш керак, деган талаб умуман йўқ. Аммо катта тўйхоналарни соддалаштирилган тартибда бошқа фаолият турларига қайта ихтисослаштириш масаласи Вазирлар Маҳкамаси томонидан кўриб чиқиляпти. Дастлабки хатлов ва таҳлил натижаларига кўра, аксарият тўйхоналарни концерт ва оммавий томоша ўтказишга мўлжаллаб ихтисослаштириш юзасидан кўплаб мурожаатлар бўлган. Тўйхоналаримизнинг кўпи эвакуация, ёнғин хавфсизлиги каби талабларга тўла жавоб беради.
Шунингдек, тўйхоналарни кинотеатрлар фаолиятига ихтисослаштириш масаласи ҳам «Ўзбеккино» миллий агентилиги ва Давлат активларини бошқариш агентлиги ҳамкорлигида ўрганилмоқда. Кинематографияни 2030 йилгача ривожлантириш концепцияси лойиҳаси ишлаб чиқишда ҳам тўйхона, кафе ва ресторан эгалари бўлган тадбиркор субъектлари манфаатларини назарда тутамиз.
Агар тадбиркор 1000 кишилик тўйхонасида фитнес, кинотеатр, томоша зали каби бошқа фаолият турларини ҳам йўлга қўйиш истагида бўлса, бунга сира қаршилик йўқ. Мабодо қайта ихтисослаштириш жараёнида қандайдир муаммо туғилса, уни соддалаштирилган тартибда кўриб чиқишга тайёрмиз», — деди ҳукумат вакили, дея унинг сўзларини келтирмоқда «Дарё» мухбири Миролим Исажонов.
Изоҳ (0)