Ўзбекистонда рақамли банкингни ривожлантириш концепциясига мувофиқ, Марказий банк томонидан тижорат банклари билан ҳамкорликда QR-код (Quick Response Code — тезкор аниқланадиган код) орқали тезкор тўловни амалга оширишнинг QR-online стандартлаштирилган ва универсал хизмати ишга туширилди. Бу ҳақда Марказий банк матбуот хизмати хабар берди.
Мазкур тизим доирасида савдо ва хизмат кўрсатиш шохобчалари (хўжалик юритувчи субъектлар) ўзларига хизмат кўрсатувчи тижорат банклари орқали QR-кодни шакллантириб, рўйхатдан ўтказади. Харидорлар томонидан мобил илова дастурлари воситасида савдо ва хизмат кўрсатиш корхоналарининг QR-кодларини сканер қилиш («ўқиш») ҳамда харид суммасини киритиш орқали тўловлар амалга оширилади. Бунда пул маблағлари мобил иловага бириктирилган банк карталари ҳисобварақлари ва электрон пул ҳамёнлардан ҳисобдан чиқарилади.
Савдо ва хизмат кўрсатиш корхоналари QR-online тизими орқали мижозлардан қабул қилинган ва банк ҳисобварақларига кирим қилинадиган маблағларни Telegram тармоғидаги @onlineqrbot канали, мижознинг банк шахсий кабинети ҳамда смс-хабарнома хизмати орқали онлайн режимида назорат қилиб боришлари мумкин.
«Мазкур тизим мавжуд муқобил тўлов хизматларидан фарқли ўлароқ, халқаро стандартлар асосида ишлаб чиқилган бўлиб, Марказий банкнинг ҳисоб-китоблар клиринг тизими билан узвий боғлиқликда ишлайди», — дейилади хабарда.
Тижорат банкларининг тўлов хизматлари бозоридаги мазкур янги таклифи маҳсулотларни мижозгача етказиб бериш, йўловчиларни ташиш каби соҳаларда фаолият кўрсатувчи ташкилотларга терминалларсиз тўловларни қабул қилиш имкониятини яратиш билан боғлиқ қўшимча қулайликларни тақдим этади.
Ҳозирги кунда ушбу тизимни Тошкент шаҳрида татбиқ этиш доирасида тижорат банклари томонидан 3 мингдан ортиқ хўжалик субъектларининг савдо ва хизмат кўрсатиш пунктлари уларга тегишли QR-online тизими стикерлари билан таъминланди.
Изоҳ (0)