«Дарё»да «Қашқадарёлик бева аёлнинг уйи бузиб ташланди. Оила кўчада қолди» сарлавҳали мақола эълон қилинганди. МИБ Қашқадарё вилоят бошқармаси мазкур мақолага муносабат билдирди.
Фото: Видеодан скриншот
Қашқадарё вилоят бошқармасининг хабар беришича, Фуқаролик ишлари бўйича Чироқчи туман судининг 2017 йил 6 июнь кунидаги ижро варақасига асосан даъвогар Чироқчи туман ҳокимлиги фойдасига фуқаро С.Бобонова томонидан Чироқчи туман «Дам» маҳалла фуқаролар йиғини Дам қишлоғи ҳудудида 12х4 квадрат метр ўлчамдаги ноқонуний қурилган уй-жойни фуқаронинг ҳисобидан мажбурий буздириш белгиланган. Ижро варақаси бюронинг Чироқчи туман бўлимига 2017 йил 10 август куни келиб тушган. Бироқ туман ҳокимлиги ҳуқуқшуноси Х.Бўроновнинг 2019 йил 14 мартдаги хатига асосан ижросиз қайтарилган.
Туман ҳокимлиги томонидан ижро варақаси МИБ туман бўлимига 2019 йил 25 май куни ижро учун қайта топширилган. Қарздор С.Бобонова бир неча марта ёзма ва оғзаки огоҳлантирилиб, имконият берилишига қарамасдан ихтиёрий бузиб олиш чорасини кўрмаганлиги сабабли ижро ҳаракатлари бир неча марта кечиктирилган.
2020 йил 5 февраль куни яна ижро ҳаракатлари тайинланган. Ижро ҳаракатлари тайинланишига даъвогар тараф — туман ҳокимининг ўринбосарлари Ў.Абдураҳимов, Э.Бобоқуловлар ташаббускор бўлган. Туман ҳокимилиги вакили ижро ҳаракатларида иштирок этган ва расмийлаштирилган ҳужжатларга имзо қўйган. Ижрочига уйни бузиш учун техника воситаси ҳам туман ҳокимлиги томонидан берилган. Туман ҳокимлигига С.Бобонованинг қўшниси О.Хуррамова унинг ноқонуний қуришидан норози бўлиб, бир неча марта оғзаки шикоят қилавергач, туман ҳокимлиги уйни бузиб шикоятчининг мурожаатини қаноатлантирмоқчи бўлган.
Аввалроқ «Дарё» мухбири билан суҳбатлашган ҳоким ўринбосари Ўктам Абдураҳимов ҳокимлик уйни бузиш ҳаракатларини тўхтатишга уринганини таъкидлаганди.
«Ваколатимизга кирмаса-да, фуқаро ҳақида қайғурганимиз учун ҳам 2018 йил май ойида МИБ фуқаронинг уйини мажбурий тартибда бузиш учун борганида МИБ раҳбариятига илтимос қилиб, ижрони маълум муддатга тўхтатдик», — деганди Чироқчи туман ҳокими ўринбосари Ўктам Абдураҳимов.
Маҳалла раиси Ёрқул Бекмуродов ҳам фуқаро уйи бузилгач воқеа жойига келган туман ҳокими Хуррам Жўраев уни уйни бузиш ишларига тўсқинлик қилолмагани учун койиганини айтганди. МИБ ходими Нурбек Хидиров эса уйни бузиш туман ҳокимнинг топшириғи асосида бажарилганини таъкидлаганди.
