Милан шаҳридан келган Финляндия фуқаросида коронавирус билан касалланиш ҳолати кузатилди, деб хабар бермоқда соғлиқни сақлаш ва ижтимоий таъминот миллий институти (THL). Бу ҳақда «РИА Новости» хабар тарқатган.
Фото: Post Online Media
«Хельсинки вилоятидаги Уусимаа ҳудудида коронавирус инфекцияси кузатилди буни лабаратория тадқиқотлари ҳам тасдиқлади. Бемор Италия шимолида Милан шаҳрида вирусни юқтириб олган. У айни вақтда Хельсинки университет касалхонасида даволанмоқда. Аёлнинг ҳолати анча яхши», – дейилган хабарда.
Финляндия ОАВ гап ўрта ёшли, меҳнатга лаёқатли аёл киши ҳақида кетаётгани, унинг ўзи тиббиёт муассасасига мурожаат қилгани ва ҳозирда соғлиғи барқарор эканлигини қайд этган.
Италияда коронавирус туфайли вафот этганлар сони 12 нафарга етган, эпидемия бошланган вақтдан буён жами 374 нафар италиялик вирус билан касалланган. Бу ҳақда Римда ўтган матбуот-анжуманида Италия фуқаро муҳофазаси хизмати раҳбари Анжело Боррелли маълум қилган.
Мавзуга доир:
Хитой ҳукумати 2019 йилнинг 31 декабрь куни Жаҳон соғлиқни сақлаш ташкилотини Хубэй провинцияси Ухань шаҳрида номаълум вирус тарқалгани ҳақида огоҳлантирган. Мутахассислар касаллик тарқатувчи янги коронавирус эканини аниқлаган. ЖССТ касаллик тарқалишини халқаро даражадаги фавқулодда вазият деб тан олди ва коронавирусга COVID-19 расмий ном берди. Хитойнинг материкли қисмида касалланган одамлар сони 26 февраль ҳолатига кўра, 78 минг нафарга етган, 2715 нафар одам коронавирус оқибатида вафот этган, 29 мингдан ортиқ одам ундан тузалган. ЖССТ маълумотига кўра 33 мамлакатда COVID-19 коронавируси билан боғлиқ 80 мингдан ортиқ ҳолат кузатилган.
