Тошкент прокурори шаҳарнинг ҳар бир туманида бир млн донадан дарахт экилишини эълон қилди

Ўзбекистон пойтахтининг ҳар бир туманида бир миллион донадан дарахт экилади. Бу ҳақда Тошкент шаҳар прокурори Баҳриддин Валиев Яккасарой туманидаги «Юнус Ражабий» маҳалласида 81 та кўп йиллик дарахтлар кесиб ташланиши ҳодисасидан сўнг «Ўзбекистон 24» телеканалига берган интервьюсида айтиб ўтди.

Аввалроқ шаҳар прокурори дов-дарахтларни кесишга қарши 2019 йил 30 октябрь куни Президент томонидан жорий этилган мораторий ижросини таъминлаш борасида ҳудудда камчиликларга йўл қўйилганини тан олиб, шаҳар прокуратура органлари «Президентимиз ва халқимиз олдидаги ишончни оқлай олмагани»ни таъкидлагани ҳақида хабар берилган эди.

Прокурор Валиевнинг қўшимча қилишича, у раҳбарлик қилаётган идора Тошкент шаҳридаги 11 та туманнинг ҳар бирида бир миллион донадан дарахт экиш акциясини ўтказиш ташаббуси билан чиққан (акция тафсилотлари, хусусан, у қачон ўтказилиши, 11 миллион дона дарахт қачонгача ўтқазиб бўлиниши режалаштирилгани очиқланмаган).

«Президент ва халқимиз олдидаги ишончни оқлаш учун Тошкент шаҳар прокуратураси шаҳардаги тўртта сектор раҳбарлари ва кенг жамоатчилик билан биргаликда ҳар бир туманда бир миллионтадан дарахт экиш акциясини ўтказиш ташаббуси билан чиқяпти. Олдимизга қўйилган вазифани тўла-тўкис амалга ошириб, юртимиз раҳбари олдида, халқимиз олдида юзимизни ёруғ қиламиз, деб ишонтираман.

Баҳриддин Валиев, Тошкент шаҳар прокурори

Эслатиб ўтамиз, «Юнус Ражабий» маҳалласида юз берган ҳодиса жамоатчилик эътирозига сабаб бўлиб, шаҳар ва мамлакат раҳбарияти эътиборини ўзига қаратгач, кесиб ташланган дарахтзор ўрнида зудлик билан янги яшил маскан барпо этишга киришилди, дарахтларни кесишга рухсат берган Яккасарой тумани ҳокими ўринбосари ва дарахтзор ўрнида кўп қаватли уй қурмоқчи бўлган тадбиркорга қарши жиноят иши очилди, бир қатор масъуллар ҳайфсан олди.Маълумот учун, ҳозирги кунда Тошкент шаҳрида 11 та туман бор. Булар — Бектемир, Миробод, Мирзо Улуғбек, Олмазор, Сергели, Учтепа, Чилонзор, Шайхонтоҳур, Юнусобод, Яккасарой ва Яшнобод туманларидир.