Payme’ning 2019-yil yakunlari bo‘yicha ko‘rgan daromadi miqdori 8,6 million gruzin larisi — taxminan 3 million AQSh dollariga teng bo‘ldi. Bu haqda Payme’ning 51 foiziga egalik qiluvchi Gruziyaning TBC Bank axborotida ma’lum qilingan.
Kompaniya vakillarining qayd etishicha, o‘sish 84 foizni tashkil etgan va 2020-yil yakunlariga ko‘ra ushbu ko‘rsatkich 12,3 million lari (taxminan 4,3 million dollar)ni tashkil etishi kutilmoqda.
EBITDA (xarajatlarni chiqarib tashlaguncha bo‘lgan foyda miqdori) miqdori 4,5 million lari (1,5 million dollar)ni tashkil etdi. Hisobotda ta’kidlanishicha, bu borada o‘sish 77 foizni tashkil etgan va hozirda Payme o‘z xarajatlarini o‘zi qoplayapti.
Payme’da ro‘yxatdan o‘tgan foydalanuvchilar soni 1,7 million kishidan oshib ketgan. Ushbu ko‘rsatkichni ham 2020-yil yakuniga qadar 2,8 million kishiga yetkazish maqsad qilingan. 2019-yilda 40,1 million tranzaksiya amalga oshirilgan bo‘lsa, 2020-yilda ushbu miqdor 52,2 millionga yetishi prognoz qilinmoqda.
Izoh (0)