Ўзбекистонда лицензия асосида мустақил ҳамширалик фаолияти билан шуғулланишга рухсат бериш таклиф этилмоқда. Бу ҳақдаги петиция «Менинг фикрим» жамоавий мурожаатлар порталида эълон қилинди.
Петицияда айтилишича, ҳозирги кунда Ўзбекистонда ҳамширалик ҳамда фелдшерлик таълим йўналишини тугатган ўрта ва олий маълумотли ишсиз уй бекалари кўпчиликни ташкил қилади.
Петиция муаллифи қўшимча иш билан банд бўлиш учун уларга ҳамширалик фаолияти учун лицензия беришни таклиф қилмоқда. Унинг фикрича, бу турдаги ҳамшираларга шифокорнинг ёзма рецепти ва кўрсатмаси асосида хизмат кўрсатишига рухсат бериш керак. «Оғир аҳволдаги беморларга фақат тиббиёт масканида, шифокор назорати билан тиббий ёрдам берилади. Аммо битта оддий ёки осма укол қўйиш, енгил муолажалар учун ҳамшираликка лицензия билан рухсат бериш керак», — дейилади таклифда.
Қайд этилишича, агарда ўрта ва олий маълумотли ҳамшира уй бекаларига ҳамширалик фаолияти учун лицензия берилса, иш ўринлари кўпаяди ва фуқаролар рецепт асосида муолажа олиш учун шифохоналарда узоқ навбатларда турмайди.
Аввалроқ, Фарғона ва Термизда ҳамширалар беморларнинг яқинлари томонидан калтакланган эди.
Изоҳ (0)