Ўзбекистонда мавжуд жазони ижро этиш колониялари ва тергов ҳибсхоналарида барча қулайликларга эга адвокат ва терговчилар учун 69 та алоҳида хона ташкил этилган. Тергов жараёни ва сақлаш шароитларининг шаффофлигини таъминлаш, қийноқ ва жисмоний тазйиқ ўтказиш билан боғлиқ салбий ҳолатларнинг олдини олиш мақсадида 2 минг 989 та замонавий видеокузатув мосламаси ўрнатилган. Бу ҳақда 20 февраль, пайшанба куни, бўлиб ўтган Ёшлар пресс-клубининг навбатдаги сессиясида маълум қилинди, дея Ёшлар медиа маркази матбуот хизмати «Дарё»га хабар берди.
Сессияда таъкидланишича, маҳкумларнинг мурожаатлари, мавжуд муаммоларини ўрганиш ва уларни ижобий ҳал қилиш юзасидан Жазони ижро этиш бош бошқармаси томонидан сайёр қабуллар ўтказиб келинмоқда. Барча қамоқхоналарда Омбудсман, Бош прокуратура ва Ички ишлар вазирлигига юбориладиган ариза, шикоятларга мўлжалланган алоҳида қутилар ҳам бор.
«Республикадаги меҳнатга лаёқатли маҳкумларнинг 88 фоизи етарли шароитга эга муносиб иш билан таъминланган. Улар қонунчиликка кўра, ҳафтасига 40 соат ишга жалб этилади. 2020 йилнинг 1 февралидан бошлаб, меҳнатга ҳақ тўлашнинг энг кам миқдори 679 минг 330 сўм этиб белгиланди. Шундан келиб чиқиб, 1 февралдан меҳнат қилаётган маҳкумларга ҳар бир иш куни учун 26 минг 815 сўмдан иш ҳақи тўланяпти. Ойлик маош миқдори эса ўртача 1 миллион сўмдан 1,5 миллион сўмгачани ташкил этмоқда. Шунингдек, маҳкумларнинг иш ҳақидан ижтимоий суғурта ажратилмаслиги белгиланиб, пенсия таъминотига эга бўлиши таъминланди», — деди ИИВ Жазони ижро этиш бош бошқармаси расмийси Жамшид Султонов.
Изоҳ (0)