O‘zbekistonda litsenziya asosida mustaqil hamshiralik faoliyati bilan shug‘ullanishga ruxsat berish taklif etilmoqda. Bu haqdagi petitsiya “Mening fikrim” jamoaviy murojaatlar portalida e’lon qilindi.
Petitsiyada aytilishicha, hozirgi kunda O‘zbekistonda hamshiralik hamda feldsherlik ta’lim yo‘nalishini tugatgan o‘rta va oliy ma’lumotli ishsiz uy bekalari ko‘pchilikni tashkil qiladi.
Petitsiya muallifi qo‘shimcha ish bilan band bo‘lish uchun ularga hamshiralik faoliyati uchun litsenziya berishni taklif qilmoqda. Uning fikricha, bu turdagi hamshiralarga shifokorning yozma retsepti va ko‘rsatmasi asosida xizmat ko‘rsatishiga ruxsat berish kerak. “Og‘ir ahvoldagi bemorlarga faqat tibbiyot maskanida, shifokor nazorati bilan tibbiy yordam beriladi. Ammo bitta oddiy yoki osma ukol qo‘yish, yengil muolajalar uchun hamshiralikka litsenziya bilan ruxsat berish kerak”, — deyiladi taklifda.
Qayd etilishicha, agarda o‘rta va oliy ma’lumotli hamshira uy bekalariga hamshiralik faoliyati uchun litsenziya berilsa, ish o‘rinlari ko‘payadi va fuqarolar retsept asosida muolaja olish uchun shifoxonalarda uzoq navbatlarda turmaydi.
Avvalroq, Farg‘ona va Termizda hamshiralar bemorlarning yaqinlari tomonidan kaltaklangan edi.
Izoh (0)