Беларусдаги шакар заводларининг директорлари ўз айбларини тан олиб, колхозда ишлашга тайёр эканликларини билдирди. Бу ҳақда Республика президенти Александр Лукашенкога таяниб, «CТВ» канали хабар берди.
Беларусь етакчиси ушбу вазият бўйича қуйидагиларни маълум қилди: «Мана, ҳозир ўтиришибди (қамоқда — таҳрир.) бизни қўйиб юборинг, колхозга бориб гўнг ташиймиз деб. Мен эса уларга ‘Биз паншаха билан гўнг ортмай қўйганмиз, шундай экан ўтиринглар’, дедим».
Лукашенконинг айтишича, «шакар иши»га алоқадор шахслар қилган жиноятларини тан олган ва ўзларининг озод қилинишини сўрамоқда. «Сени ким қамоққа ўтқазди — ўзингни ўзинг-ку», — дейди Беларусь етакчиси.
Республикадаги барча шакар заводларининг директорлари 28 январь куни қўлга олинган эди. Журналистларнинг маълумотларига кўра, тергов ишларини Беларусь давлат хавфсизлик қўмитаси олиб бормоқда. «Шакар иши» бўйича жами 11 киши қўлга олинган. Хусусан, Городей шакар комбинатининг директори Михаил Криштапович дам олишга учиб кетаётганида ушланган. Шу сабаб Беларусь куч тузилмалари Минск—Мюнхен рейсини ўзгартириб, уни Гроднода қўнишга мажбур қилганди.
Лукашенконинг сўзларига қараганда, қўлга олинганлар шакарни Россия савдо уйига арзон нархларда етказиб берган, шундан кейин бозорларда қиммат нархда сотган. Ўртадаги фарқни завод директорлари олган.
Изоҳ (0)