Олий суд ИИБ ходими томонидан калтакланган андижонликнинг судига журналистларнинг киритилмагани билан боғлиқ ҳолатга изоҳ берди
Андижонлик Жасурбек Ҳамроқулов Андижон шаҳар 6-сон ИИБ профилактика инспектори Сардор Абдуманнопов томонидан 2019 йил 11 сентябрь кун ИИБ биносида калтаклангани ҳақида хабар берилган эди. Ўзбекистон Ички ишлар вазирлиги ва Бош прокуратураси мазкур ҳолат юзасидан маълумот берган эди.
Ўзбекистон Олий суди томонидан маълум қилинишича, жорий йилнинг 7 февраль куни «Севимли» телеканали орқали фуқаро Жасурбек Ҳамроқулов ишига оид суд жараёни бошлангани ҳақида кўрсатув намойиш этилган. Кўрсатувда муаллиф, «Севимли» телеканалининг Андижон вилояти бўйича мухбири Г. Рустамова томонидан журналистларнинг суд залига қўйилмаганлиги таъкидланган.
Қайд этилишича, Жасурбек Ҳамроқулов ички ишлар инспекторининг қонуний талабига бўйсунмай, қаршилик кўрсатгани, жамоат жойида ҳеч бир сабабсиз ўзига нотаниш бўлган фуқароларнинг тинчлигини бузиб, фуқаро О. Болтабоеванинг юзига уриб, жароҳат етказгани, безорилик жиноятини содир этгани ҳолати юзасидан унга нисбатан жиноят иш қўзғатилган.
Олий суднинг маълум қилишича, Андижон шаҳар прокуратураси томонидан Ўзбекистон Республикаси Жиноят кодексининг 219-моддаси 1-қисми, 277-моддаси 2-қисми «г» бандида назарда тутилган жиноятларни содир этганликда айбланган Жасурбек Ҳамроқуловга оид жараён жиноят ишлари бўйича Марҳамат туман судининг иш юритувига 2020 йил 23 январь куни келиб тушган. Суднинг 2020 йил 29 январдаги қарори билан жиноят ишини суд мажлисида кўриб чиқиш 2020 йил 7 февраль куни соат 14:00 га тайинланиб, судланувчи, жабрланувчилар ва тарафларга маълум қилинган.
Судланувчининг суд мажлисига кечикиб, белгиланган вақтдан икки соат ўтиб, соат 16:00 да етиб келгани сабабли, ишни кўриш 2020 йил 7 февраль куни соат 16:05 да бошланган. Судланувчи, жабрланувчилар ва тарафлардан ОАВ вакилларини жалб қилиш ҳақида илтимоснома келиб тушмагани ҳамда раислик қилувчининг хабари бўлмагани учун судда судланувчи, жабрланувчилардан О. Болтабоева сўроқ қилиниб, иш вақти тугагани учун ишни кўриш бошқа кунга қолдирилиб, танаффус эълон қилинган.
Олий суд томонидан қайд этилишича, «Севимли» телеканали орқали намойиш этилган телелавҳада таъкидланганидек, 7 февраль куни бўлиб ўтган биринчи суд мажлисига журналистларнинг киритилмагани масаласи ўрганилганида, суд раисига суд жараёнини тасвирга олиш, журналистларнинг иштирок этиши бўйича ёзма мурожаат ёки илтимоснома келиб тушмаган.
Таъкидланишича, Ўзбекистон Республикаси Жиноят-процессуал кодексининг 19-моддасида «…суд залида овозларни ёзиб олиш, фотосуратга, видеоёзувга ва кинотасвирга олишга фақат суд мажлисида раислик қилувчининг рухсати билан йўл қўйилади, бу ҳақда тегишли ажрим чиқарилади» деб белгиланган.
Олий суднинг қўшимча қилишича, суд жараёнини ёритиш учун оммавий ахборот воситалари вакиллари ариза ёки илтимоснома билан суд раисига ёзма мурожаат қилиши, уларнинг суд ишини тасвирга олиш масаласи суд раиси томонидан мустақил ҳал этилади.
