Мўғулистон президенти Халтмаагийн Баттулга миллий байрам Цаган Сарни (Ой календари бўйича мўғулча Янги йил) нишонлаш билан боғлиқ барча оммавий тадбирларни тақиқлади. Бу чора коронавирус тарқалишининг олдини олиш мақсадида қабул қилинган. Бу ҳақда «РИА Новости» хабар берди.
Президент томонидан имзоланган ҳужжатга кўра, коронавируснинг дунёнинг кўплаб мамлакатларида ва қўшни Хитойда тарқалганини ҳисобга олган ҳолда, Цаган Сар байрамини нишонлаш билан боғлиқ барча оммавий тадбирлар бекор қилинади.
Зудлик билан кўрилиши керак бўлган чоралар қаторидан байрам ярмаркаларининг ёпилиши, шунингдек, теле ва радиоэфирдан байрам билан боғлиқ табрик ва реклама роликларининг олиб ташланиши ўрин олган. Жорий йилда мазкур байрам 23 февралдан 24 февралга ўтар кечаси нишонланади.
Маълумот учун, Хитой Соғлиқни сақлаш давлат комиссияси мамлакатда COVID-19 коронавируси оқибатида вафот этганлар сони 1113 кишига етгани ҳақида хабар берди. Хитой бўйлаб вирусни юқтириб олганлар сони 44 653 кишини ташкил этмоқда, шу кунга қадар уларнинг 4740 нафари даволанган, 8204 одам оғир аҳволда, касаллар билан алоқда бўлган яна 185 минг киши назорат остига олинган.
Мавзуга доир: Ухандаги касалхона ҳамширалари коронавирусдан даволанаётган беморлар учун оммавий рақс уюштирди (видео)
Мавзуга доир: Хитой коронавируси бўйича 12 февралнинг асосий хабарлари
Изоҳ (0)