Тошкент шаҳар Мирзо Улуғбек тумани ҳудудида электровоз темир йўлни кесиб ўтаётган Matiz билан тўқнашди. Бу ҳақда Тошкент шаҳар ИИББ хабар берди.
Маълум қилинишича, 2020 йил 7 февраль куни тахминан соат 06:20 да Мирзо Улуғбек туманидан ўтувчи Кичик ҳалқа автомобиль йўлидаги «Салар» темир йўл бекати яқинида электровоз ва Matiz автомобили иштирокида йўл-танспорт ҳодисаси юз берган. Темир йўлнинг тартибга солинмаган қисмидан 66 ёшли Александр А. бошқарувидаги Matiz автомобили ўтаётган вақтида, Оҳунбобоев—Чуқурсой йўналиши бўйлаб ҳаракатланган машинист Баҳром Р. бошқарувидаги электровоз автомобилга келиб урилган.
ИИББ томонидан маълум қилинишича, ЙТҲга Matiz ҳайдовчиси яқинлашаётган поезд йўқлигига ишонч ҳосил қилмасдан ҳамда уни ўтказиб юбормасдан темир йўлни кесиб ўтгани сабаб бўлган.
Аввалроқ, Сурхондарёда поезд ва Damas тўқнашуви оқибатида 1 киши жароҳатланган эди. Тошкентнинг Сергели туманида эса «Газель» машинаси юк поездига урилгани ҳақида хабар берилган эди. Самарқандда январь ойида поезд уриб кетиши оқибатида 3 киши вафот этган. Уларнинг бири 8-синф ўқувчиси бўлган.
Изоҳ (0)