Ўзбекистонда шу вақтгача газеталарнинг 98 фоизи мажбурий обуна ҳисобига кун кўриб келган. Бу ҳақда Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов влогер Лазизбек Ҳамидовнинг «Улар» лойиҳасига берган интервьюсида айтиб ўтди.
Лазизбек Ҳамидовнинг: «Агар эртадан мамлакатда газеталарга мажбурий обуна тўхтатилса нима бўлади?», мазмунидаги саволига Алламжонов шундай жавоб берди: «Унда газета қолмайди — фақат ‘Даракчи’, ‘Сўғдиёна’, яна бир иккита бозорда ўз ўрнини топган газеталарни ҳисобга олмаса. Чунки Ўзбекистонда 98 фоиз газета шу пайтгача мажбурий обуна ҳисобига яшаб келган».
Комил Алламжоновнинг таъкидлашича, «сўз эркинлиги бўлмагандан кейин, газеталар ҳам қизиқ бўлмайди, ундаги мақола, янгиликлар жаннатдан хабарлардек бўлиб қолаверади ва умуман одамларда қизиқиш уйғотмайди», лекин бу газеталарни реализация қилиш керак, шу сабабли ҳам давлатнинг бўғилган матбуот кўмаги ўлароқ мажбурий обуна юзага келади.
Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси энди замон ўзгарганлиги, агар газеталар ўз фаолиятини эркин бозор ва рақобат шароитига мослаштириб ташкил этмаса, ёпилиб кетиши мумкинлигини айтиб ўтди.
«Шахсий фикрим — газета форматининг келажаги деярли йўқ, деб ҳисоблайман. Ҳамма интернетга ўтиб кетаяпти, ҳаммаёқда гаджетлар. Балки газеталарнинг ҳам кичкинагина аудиторияси бўлар... Ҳаёт рақамли технологияларга мослашяпти — бу газета ёпилиб кетади дегани эмас, аммо қоғозли формат анча қийин аҳволга тушиб қолиши мумкин», — дея қўшимча қилди Алламжонов.
Изоҳ (0)