Қашқадарё ҳокими Зоир Мирзаев Шаҳрисабз туманининг Сарчашма қишлоғида тўйда меҳмон бўлиб, келин-куёвларга рўзғор буюмларини совға қилган. Бу ҳақда Қашқадарё ҳокимлиги ахборот хизмати хабар берди.
Маълум қилинишича, Зоир Мирзаев бошчилигидаги сектор раҳбарларининг навбатдаги сайёр қабули Шаҳрисабз туманининг Тожикистон Республикаси билан чегарадош қисмида жойлашган Сарчашма қишлоғида бўлиб ўтган.Қишлоқ аҳли билан ўтказилган мулоқотдан сўнг, вилоят ҳокими билдирилган барча мурожаат ва таклифлар асосли эканлигини таъкидлаган.
Айтилишича, Сарчашма қишлоғида мавжуд бўлган боғча ва шифохона таъмирталаб аҳволда.
— Электр энергияси билан боғлиқ масалалар шу куннинг ўзида ҳал этилди, — деди вилоят ҳокими. — Йўлларни, қишлоқда ягона бўлган боғча ва шифохонани таъмирлаш, деҳқончилик қилиш учун ариқлар орқали режа асосида қишлоқни сув билан таъминлаш каби масалалар жорий йилда бартараф этилади.
Вилоят ҳокимлиги ахборот хизматининг қўшимча қилишича, Зоир Мирзаев қишлоқ аҳлининг шарт-шароитини ўрганиб, вазиятни ҳис қилиш учун қишлоқда бир кун қолган.
Изоҳ (0)