Голливуд актёри Кирк Дуглас 103 ёшида оламдан ўтди. Бу ҳақда актёрнинг ўғли Майкл Дуглас Instagram’даги саҳифаси орқали маълум қилди.
«У бутун дунё учун афсонага айланган, ‘олтин аср’ киноматографиясининг актёри, гуманист, ўзининг адолатга бўлган содиқлиги билан барчамизга ўрнак бўлган эди. Кирк узоқ умр кўриб, келажак авлод учун кинода из қолдирди, шунингдек, таниқли филантроп сифатида жамият ва жаҳондаги тинчлик учун меҳнат қилди», — деб ёзади актёрнинг ўғли.
Кирк Дуглас умри давомида 80 дан ортиқ фильмларда суратга тушган. Улар орасида «Ёвузлар ва гўзаллар» (1952), «Ҳаёт чанқоғи» (1956), «Машҳурлик йўлаги» (1957), «Спартак» (1960) фильмлари бутун дунё бўйлаб мухлислар қалбидан жой олган. 1996 йилда кино соҳасидаги улкан фаолияти учун у «Оскар» мукофотига сазовор бўлганди.
Изоҳ (0)