Футбол бўйича Англия Премьер Лигасида пешқадамлик қилаётган «Ливерпуль» мусобақа тугашига етти тур қолганида чемпионликни расмийлаштириши мумкин, дея хабар қилмоқда Gracenote.
Европа кучли бешлик лигалари тарихида бундай натижа фақат икки бор кузатилган: 2015/16 йилги мавсумда ПСЖ мавсум якунланишига саккиз тур қолганида Франция чемпионига айланган, 2013/14 йилги мавсумда эса «Бавария» етти тур аввал Бундеслига ғолиблигини қўлга киритганди. Англияда эса бундай натижа ҳали қайд этилмаган.
Агар «Ливерпуль» худди шу жадалда кетадиган бўлса, яна олтита ғалабадан кейин яъни 31-турда чемпионликни қўлга киритиши мумкин. Агар таъқибчилар очко йўқотадиган бўлса «қизиллар» ундан ҳам аввал чемпионликни тантана қилиши мумкин.
«Ливерпуль» Премьер Лига жорий мавсумида 25-турдан кейин 24 ғалаба ва бир дуранг қайд этган ҳолда 73 очко билан энг яқин таъқибчиси «Манчестер Сити»ни 22 очкога ортда қолдирмоқда. Юрген Клопп жамоаси кейинги, 26-турда 20-ўринда бораётган «Норвич» майдонига сафар қилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)