Ижтимоий тармоқларда «Хитой вируси муносабати билан хавфсизлик чоралари кўрилганмикан?» деган хавотирли фикрлар, «Андижонга Хитойдан касаллик олиб келганлар йўқмикан?» мазмунида пайдо бўлган кўплаб саволларга Андижон вилояти соғлиқни сақлаш бошқармаси муносабат билдирди.
Қайд этилишича, Андижон вилоятида 30 январь, пайшанба куни, Жалақудуқ туманида 1 нафар, Асака туманида 2 нафар, Андижон туманида 1 нафар, Булоқбоши туманида 1 нафар, жами 5 нафар шахс Хитойдан ташриф буюрган. Уларнинг барчаси Тошкент аэропортиданоқ назоратга олинган, Андижонда ўрнатилган тартибда тадбирлар ўтказилган.
Уларда Хитой вируси борлигига гумонлик доирасида текширилганда, бошқа касалликлар ҳам аниқланмаган, улар соғ-саломат. Шунингдек, чет эллардан келганларни 100 фоиз тўлиқ тиббий кўриклардан ўтказилишига алоҳида эътибор кучайтирилган.
Хусусан, Андижон туманида яшовчи, 2000 йилда туғилган А.Ю. исмли йигит ўқиётган Hangzhou Dianzi University ҳамда вирус тарқаган Wuhan, Hubei орасидаги масофа 6 кунлик (154 соат) йўл. Хитой вируси тарқалган жойларнинг онлайн кўрсатувчи картасида Ханчжоу провинцияси қайд этилмаган.У 28 январь куни уйига келган. Андижон тумани тиббиёт ходимлари томонидан тушунтириш ишлари олиб борилиб, 14 кун уйда карантин ҳолатда махсус ниқобда, режимда юриши тушунтирилган. Унга шифокор ва ҳамшира бириктирилган, кунига 3 маҳал текширишдан ўтказилмоқда. Шунингдек, иммунитетни кўтарувчи витаминлар ва бошқа дори-дармонлар тавсия этилган, кўрсатмалар берилган, тушунтириш олиб борилганлиги ҳақида ёзма маълумот олинган.
Таъкидланишича, фуқарони алоҳида сақлаш учун тиббий кўрсатма йўқ, шунингдек, ҳуқуқий асос ҳам мавжуд эмас.Эслатиб ўтамиз, Соғлиқни сақлаш вазирлиги Ўзбекистонда коронавирус тарқалгани ҳақидаги хабарлар ҳақиқатга тўғри келмаслигини, бугунги кунга қадар Ўзбекистон фуқаролари орасида инфекция қайд этилмаганини маълум қилган эди.
Ташқи ишлар вазирлиги Хитойдаги ўзбекистонликларни эвакуация қилиш учун Пекиндан Тошкентга чартер рейслар 4 ва 5 февраль кунлари Пекин аэропортининг 2-терминалидан амалга оширилишини маълум қилиб, Ўзбекистон фуқароларидан 3 февраль, душанба куни, Пекин шаҳридаги элчихонага келишларини сўраган.
Шунингдек, вазирлик авиақатновлар бекор қилингани туфайли Пекин аэропортида қолиб кетган 3 нафар ўзбекистонлик талабага ёрдам кўрсатилишини маълум қилиб, талабалар билан алоқа ўрнатиб, муаммони ҳал қилиш бўйича дипломатлар тегишли чораларни кўраётганини эълон қилди.
Изоҳ (0)