Respublikada mavjud 25 ta manzilli-koloniyada jazo o‘tayotgan mahkumlarning 300 nafardan ziyodi pensiya yoshida bo‘lib, hozirda ularning 68 nafariga pensiya puli to‘lanmoqda. Mazkur tartib 2019-yil 28-avgustda imzolangan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunga asosan yo‘lga qo‘yildi. Bu haqda 28-yanvar kuni AOKAda o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.
Tadbirda aytilishicha, budjetdan tashqari Pensiya jamg‘armasining tuman (shahar) bo‘limlari tomonidan manzilli-koloniyalarda jazoni o‘tayotgan, ozodlikdan mahrum etishga hukm qilingan 37 nafar fuqaroga pensiya tayinlangan. 31 nafar shaxsning esa ilgari to‘xtatilgan pensiya to‘lovlari tiklab berilgan. Tahlillarga ko‘ra, 62 nafar fuqaro yoshga doir, 6 nafari esa nogironlik pensiyasi olmoqda. Ularning pensiya pullari banklarda ochilgan plastik kartalar yoki omonatlariga o‘tkaziladi.
“Manzilli-koloniyalardagi 70 nafarga yaqin fuqaro ozodlikdan mahrum etilgunga qadar biror turdagi davlat pensiyasini olib kelganligi aniqlandi. Savol tug‘ilishi mumkin: nima uchun ularning 31 nafarini pensiya to‘lovi tiklab berildi? Bunga asosiy sabab sifatida mahkumlar pensiyalarni tiklashni so‘rab murojaat qilishmaganligi ma’lum bo‘ldi. Vaholanki, bu borada Pensiya jamg‘armasi tomonidan mahkumlarga tegishli tartibda murojaat qilishlari mumkinligi to‘g‘risida ma’lumotlar berilgan. O‘tkazilgan so‘rovnomalar natijasida mahkumlarning aksariyati talab etiladigan minimal 7 yil ish stajiga ega emasligi oydinlashdi.
Shu o‘rinda mahkumlarga davlat pensiyalarini to‘lash uchun mablag‘lar Pensiya jamg‘armasi moliyaviy ko‘rsatkichlariga sezilarli darajada ta’sir ko‘rsatmasligini ham ta’kidlab o‘tish lozim”, — dedi Pensiya jamg‘armasi ijro etuvchi apparati bo‘lim boshlig‘i Shuhrat O‘taganov.
Ma’lum bo‘lishicha, tartib o‘zgarganidan so‘ng murojaatlar Qoraqalpog‘iston Respublikasi, Jizzax, Qashqadaryo, Samarqand, Sirdaryo, Surxondaryo, Toshkent viloyatlaridagi manzilli-koloniyalardan kelib tushgan.
Izoh (0)