Хитойнинг коронавирус ўчоғига айланган Хубэй провинциясида 166 нафар Ўзбекистон фуқароси доимий асосда яшайди. Январь ойида провинцияга 14 нафар ўзбекистонлик келган. Бу ҳақда Хитой Иммиграция бошқармаси берган дастлабки маълумотларга асосланиб, Ўзбекистоннинг Пекиндаги элчихонаси ва Шанхайдаги бош консулхонаси маълум қилди, дея хабар беради ТИВ матбуот хизмати.
26 январь, якшанба куни Хитой ҳуқуқни муҳофаза қилиш органлари Ухань шаҳри ва Хубэй провинциясининг унга яқин жойлашган бошқа шаҳарларида истиқомат қилувчиларнинг карантин ҳудудидан чиқиб кетишларига йўл қўймаслик бўйича чораларни кучайтирди. Расмий идоралар вирусни юқтирганлар, айниқса, у ерда бўлиб турган хорижлик фуқаролар профилактикасига катта эътибор қаратмоқда.
Элчихона Хитойнинг тегишли ҳукумат идоралари билан доимий алоқада бўлиб турибди, ўзбекистонликларга консуллик-ҳуқуқий ёрдам кўрсатишда давом этмоқда ва улар ўртасида тушунтириш ишлари олиб бормоқда. Хусусан, ижтимоий тармоқларга аҳолини саросимага солувчи миш-мишларни рад этувчи видеоматериалларни ҳамда зарурий эҳтиёт чораларини кўриш бўйича эслатмаларни жойлаштирмоқда.
Ҳозирда Хитой томони Ухань шаҳридан чет эл, жумладан, Ўзбекистон фуқароларини эвакуация қилишга қўйилган тақиқни бекор қилгани йўқ.
«Элчихона январь ойида Ухандан Ватанга қайтиб келган ўзбекистонлик талабаларни зудлик билан Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлиги билан (+998909882330, директор ўринбосари Б.Қурбонов, +998972755074 бош мутахассис Ф.Қурбонбеков) телефон орқали боғланишни қатъиян тавсия қилади», — дейилади ТИВ хабарида.
Изоҳ (0)