Туризмни ривожлантириш қўмитаси раиси вазифасини вақтинча бажарувчи Абдулазиз Аққулов Тошкентдаги «Wyndham» меҳмонхонасида ёшлар билан учрашиб, очиқ мулоқот ўтказди. Бу ҳақда қўмита матбуот хизмати хабар бермоқда.
Тадбирда жамоат ташкилотлари ва чет элдаги диаспоралар билан ишлаш бошқармаси бошлиғи Ўткир Саидов, Тошкент шаҳар Туризмни ривожлантириш департаменти директори Санжар Тожиев ҳамда Ёшлар Иттифоқи раиси ўринбосари Фарруҳ Омонов ҳам иштирок этди.
Ёшларга Ўзбекистон туризми статистикаси, соҳадаги ислоҳотлар, ўзгаришлар, хориждаги ватандошларнинг Ўзбекистонга саёҳат қилишига доир тарғиботи бўйича батафсил маълумот берилди. Қайд этилишича, 2019 йил мобайнида хориждаги 4000 нафардан ортиқ ёш тарғиботга жалб этилган. Улар билан ҳамкорликда 100 дан ортиқ тадбир ўтказилиб, 60 000 дан ортиқ тарғибот материаллари тарқатилган.
Таъкидлаш жоизки, Ўзбекистон ёшларни ички туризмга жалб қилишда улкан салоҳиятга эга. Бугунга келиб мамлакатда жами 10 915 кўнгилочар маскан ва туристик объект фаолият кўрсатмоқда. Ўзбекистонда ички туризмни ривожлантириш, сайёҳларни жалб этишда турли оммавий-маданий кўнгилочар тадбирлар аҳамиятини ҳисобга олиб, ўтган йилдан бошлаб ҳар бир ҳудуднинг ўзига хослигидан келиб чиққан ҳолда турли оммавий тадбирлар ташкил этилмоқда.
Хусусан, 2020 йилда республика миқёсида 122 та тадбир ўтказилиши ва уларда асосан ёшлар иштирок этиши кутилмоқда.
Учрашув давомида ёшларнинг маънавиятини юксалтириш, тарихга қизиқишини ошириш, туризм соҳасига жалб этиш мақсадида 2020 йилнинг февраль ойида «Наврўз» маданият ва истироҳат боғида «Туризм лабораторияси» фаолияти йўлга қўйилиши ҳақида маълум қилинди.
—Туризм лабораториясида замонавий кутубхона, коворкинг маркази, бепул Wi-Fi, хорижий экспертлар томонидан ёшлар учун вебинарлар, турли тренинглар ўтказиш ҳамда талабалар учун туризм соҳасидаги китоблар, журналларга бепул обуна ва онлайн кутубхоналардан фойдаланиш каби имкониятлар яратилади. Лабораторияда ёшлар томонидан замонавий тарғибот материаллари, креатив сувенир ҳамда ҳунармандчилик маҳсулотларининг янги намуналари ишлаб чиқилади, — деди қўмита раиси.
Шунингдек, туризм соҳасини ривожлантириш бўйича алоҳида клуб ташкил этилиб, ёшлар орасидан энг фаол, энг ташаббускорлари кординатор сифатида танлаб олинади. Уларнинг фаолияти учун зарур шароитлар яратилиб, иш билан таъминлаш шарти асосида тўлов-контракт суммаларини тўлаб бериш, лойиҳаларни молиялаштириш, саёҳатлар ва хорижий стажировкалар ташкил этиш каби рағбатлантириш механизмлари жорий қилинади.
Ўткир Саидовга кўра Ўзбекистонда Ёшлар туризмини ривожлантириш концепцияси ишлаб чиқилган ва шу асосда ишланган лойиҳаларни амалга ошириш натижасида 2020—2025 йилларда мамлакатда ёшлар туризмини ривожлантиришга оид мақсадли кўрсаткичлар белгилаб олинган. Жумладан, хорижлик ёш сайёҳлар сонини 1,3 миллиондан 2020 йилда 2,2 миллионга, 2023 йилга 3,3 миллионга, ички туризм бўйича ёш сайёҳлар сонини 8,1 миллиондан 2020 йилда 10 миллионга, 2023 йилда эса 13,6 миллионга етказиш, 2020 йилда 20 та, 2023 йилда 60 та халқаро даражадаги тадбир ўтказиш режалаштирилган.
Бундан ташқари, ёшларнинг туризмга доир янги лойиҳаларини қўллаб-қувватлаш, соҳада кадрлар салоҳиятини ривожлантиришга оид маълумотлар тақдим этилди.
Шундан сўнг ёшлар Туризмни ривожлантириш қўмитаси раисига турли саволлар билан мурожаат қилиб, соҳани ривожлантиришга доир фикр-мулоҳазалари ҳамда таклифлари билан ўртоқлашди.
Изоҳ (0)