Ўзбекистон бўйлаб амалда ишлаб турган биринчи тоифали корхоналар сони 181 та бўлиб, улардан атроф-муҳитга йилига 808 минг тонна ташламалар чиқарилади. Бу ҳақда 14 январь куни Ахборот ва оммавий коммуникациялар агентлигида ўтказилган «Атроф-муҳит ифлосланиши мониторингини янада такомиллаштириш» мавзусидаги матбуот анжуманида маълум қилинди, дея хабар бермоқда «Дарё» мухбири.
«Ҳавони ифлослантириш даражаси бўйича саноат корхоналарининг статистикаси жуда кенг қамровли бўлгани туфайли бу бўйича аниқ рейтинг тузилмайди. Лекин бир неча йил олдинги маълумотларга таянадиган бўлсак, бу борада ОТМК (Олмалиқ тоғ-металлургия комбинати), йирик кимё заводлари, жумладан, Навоий азот заводини мисол қилиб келтириш мумкин.
Юқорида айтилганидек, бу бўйича махсус рейтинг тузилмагани учун аниқ маълумот бериш қийин. Биз айни пайтда рейтинг талабларини ишлаб чиқиш жараёнидамиз», — деди Экология ва атроф-муҳитни ривожлантириш давлат қўмитаси бошқарма бошлиғи Тўлаган Абдулғозиев.
Қўмита расмийсининг таъкидлашича, 2019 йил октябрь ойида 13 та цемент ишлаб чиқариш корхоналарига туташ ҳудудлар атрофидан атмосфера ҳавосига ташланаётган зарарли ташламалар бўйича намуналар олиниб, таҳлиллар ўтказилди. Олинган таҳлилларга кўра 5 та корхона атроф-муҳитга сезиларли даражада салбий таъсир ўтказгани аниқланган. Қорақалпоғистоннинг «Титан цемент» ҚКда 1,06–4,6 марта, «Каракалпак цемент» ҚКда 6,0 марта, Фарғона вилоятидаги «Turon eco sement group» корхонасида 1,68–1,8 марта, «Яйпангипс» корхонасида 1,7–1,86 марта ва «Фергана цемент» ҚКда 1,16–1,36 марта рухсат этилган меъёрдан юқори чанг миқдори борлиги маълум бўлган.
Матбуот анжуманида қайд этилишича, ўтган йили 22 та йирик корхоналарда экологик назорат тадбирлари ўтказилган. Ушбу саноат мажмуаларига нисбатан жами 50 миллиондан зиёд маъмурий жарималар қўлланилган. Ундирилган компенсация миқдори эса 2 миллиард сўмга яқиндир.
Изоҳ (0)