O‘zbekiston bo‘ylab amalda ishlab turgan birinchi toifali korxonalar soni 181 ta bo‘lib, ulardan atrof-muhitga yiliga 808 ming tonna tashlamalar chiqariladi. Bu haqda 14-yanvar kuni Axborot va ommaviy kommunikatsiyalar agentligida o‘tkazilgan “Atrof-muhit ifloslanishi monitoringini yanada takomillashtirish” mavzusidagi matbuot anjumanida ma’lum qilindi, deya xabar bermoqda “Daryo” muxbiri.
“Havoni ifloslantirish darajasi bo‘yicha sanoat korxonalarining statistikasi juda keng qamrovli bo‘lgani tufayli bu bo‘yicha aniq reyting tuzilmaydi. Lekin bir necha yil oldingi ma’lumotlarga tayanadigan bo‘lsak, bu borada OTMK (Olmaliq tog‘-metallurgiya kombinati), yirik kimyo zavodlari, jumladan, Navoiy azot zavodini misol qilib keltirish mumkin.
Yuqorida aytilganidek, bu bo‘yicha maxsus reyting tuzilmagani uchun aniq ma’lumot berish qiyin. Biz ayni paytda reyting talablarini ishlab chiqish jarayonidamiz”, — dedi Ekologiya va atrof-muhitni rivojlantirish davlat qo‘mitasi boshqarma boshlig‘i To‘lagan Abdulg‘oziyev.
Qo‘mita rasmiysining ta’kidlashicha, 2019-yil oktabr oyida 13 ta sement ishlab chiqarish korxonalariga tutash hududlar atrofidan atmosfera havosiga tashlanayotgan zararli tashlamalar bo‘yicha namunalar olinib, tahlillar o‘tkazildi. Olingan tahlillarga ko‘ra 5 ta korxona atrof-muhitga sezilarli darajada salbiy ta’sir o‘tkazgani aniqlangan. Qoraqalpog‘istonning “Titan sement” QKda 1,06–4,6 marta, “Karakalpak sement” QKda 6,0 -marta, Farg‘ona viloyatidagi “Turon eco sement group” korxonasida 1,68–1,8 marta, “Yaypangips” korxonasida 1,7–1,86 marta va “Fergana sement” QKda 1,16–1,36 marta ruxsat etilgan me’yordan yuqori chang miqdori borligi ma’lum bo‘lgan.
Matbuot anjumanida qayd etilishicha, o‘tgan yili 22 ta yirik korxonalarda ekologik nazorat tadbirlari o‘tkazilgan. Ushbu sanoat majmualariga nisbatan jami 50 milliondan ziyod ma’muriy jarimalar qo‘llanilgan. Undirilgan kompensatsiya miqdori esa 2 milliard so‘mga yaqindir.
Izoh (0)