Ўзбекистонда 2019 йилда жиноят ишлари бўйича судлар томонидан 36 845 нафар шахсга нисбатан 28 846 та иш кўриб чиқилди. Олий суд матбуот хизматининг «Дарё»га маълум қилишича, бу кўрсаткич 2018 йилга нисбатан шахслар бўйича 24,2 фоизга, ишлар бўйича эса 24,4 фоизга камдир.
Жумладан, 859 нафар шахс оқланди ва реабилитация қилинди, судланган шахслар сони 27 603 нафарни ташкил этиб, шундан 6 957 нафар шахсга озодликдан маҳрум қилиш ва 19 278 нафарига бошқа турдаги жазолар тайинланди, 1 368 нафар шахс шартли ҳукм қилинди.
Судланган шахсларнинг 24 491 нафари эркаклар, 3 112 нафари аёллар, 10 700 нафари ёшлар (шу жумладан, 497 нафари вояга етмаганлар) ва 873 нафари 60 ёшдан ошган шахслар.
Шунингдек, 3 080 нафар шахс озодликдан маҳрум этиш билан боғлиқ бўлмаган жазолар тайинланиши муносабати билан суд залидан озод қилинган, 26 436 нафари жазони ўташдан муддатидан илгари шартли озод қилинган, 8 028 нафарига тайинланган жазо енгили билан алмаштирилди ва 6 665 нафар шахсга нисбатан дастлабки тергов органлари томонидан асоссиз равишда қўйилган моддалар айбловдан чиқариб ташланди ёки қайта малакаланган.
Ҳисобот даврида ярашув институтининг самарали қўлланилиши натижасида 7 329 нафар шахс жиноий жавобгарликдан озод этилган. Етказилган 443,9 миллиард сўмдан зиёд моддий зарарнинг ўрнини қоплаган 3 187 нафар шахсга нисбатан озодликдан маҳрум қилиш билан боғлиқ бўлмаган жазо тайинланган.
Жиноят ишининг 13 890 таси, яъни барча ишларнинг қарийб 48,2 фоизи сайёр суд мажлисларида кўриб чиқилган.
Бундан ташқари, Олий суд Жиноят ишлари бўйича судлов ҳайъати томонидан назорат тартибида 1 788 нафар шахсга нисбатан 1 486 та иш кўриб чиқилган. 1 037 нафар шахсга нисбатан қуйи судлар томонидан чиқарилган қарорлар бекор қилинган ва 581 нафар шахсга нисбатан чиқарилган суд қарорлари ўзгартирилган.
Изоҳ (0)