«Ювентус» Буффонга ўринбосар топди

«Милан» клуби дарвозабони Жанлуижи Доннарумма фаолиятини Туриннинг «Ювентус»ида давом эттириши мумкин, деб ёзмоқда Sport Mediaset.

Турин клуби 20 ёшли Доннарумма учун 5 йиллик шартнома ва йилига 9 миллион евролик маош тайёрлаб қўйган. Қайд этилишича, ушбу маош йилдан йилга ўсиб бориши режалаштирилган. Футболчи «Милан»да ҳозир йилига 6 миллион евро маош олади.

Таъкидлаш жоиз, Жижининг агенти Мино Райола ҳисобланади. «Ювентус» Райола билан Маттейс де Лигт трансферидан сўнг яхши алоқаларга эга бўлиб турибди.

Доннарумманинг «Милан» билан амалдаги шартномаси 2021 йил 30 июнида якунига етади. Футболчи жорий мавсум А Серияда 17 та ўйин ўтказиб, 6 та баҳсда ўз дарвозаси дахлсизлигини сақлаб қолди.

Эслатиб ўтамиз, мавсум сўнгида Жанлуижи Буффон фаолиятини якунлаши кутилмоқда. Айни дамдаги асосий посбон Войцеҳ Шесни эса ҳозирча Турин клубининг 100 фоиз ишончини оқлай олаётгани йўқ.